Green Mizoram Day hman a ni

Nimin khan Mizoram hmun hrang hrang­ah Green Mizoram Day hman a ni. Aizawl­ah chuan Chite lui kam, Ramthar Veng leh Ṭhuampui inkara Chite lei bulah hman a ni a, chief minister Lal Thanhawla'n a hawng.

Chief Minister chuan, ramngaw humhalh leh thing phun uar inzirtirna kawnga hmalakna chu kum 1998-ah Green Aizawl tia vuahin bul ṭan a ni tih sawiin, "Kum 1999 khan Green Mizoram tia vuah a ni a, chuta ṭang chuan kum tin khaihlak loin Mizoram pumah kalpui a ni. Hei hian environment humhalh leh siamṭhat a tum bakah, faina leh thianghlimna nen pawh a inkungkaih a ni," a ti.

Green Mizoram bul ṭan a nih aṭanga thing phun tawh chu nuai 37 vela chhût a nih thu sawiin CM Hawla chuan, "A phun mai ni loin, thing phun tawh humhalhna kawngah pawh ṭan lak tel a ṭul," a ti a; Monitoring Committee lamin hma an lak ṭhat avanga thing phun nung chhuak zatin hma a sawn zel chu lawmawm a tih thu a sawi.

Lal Thanhawla chuan, mipui náwlpui, ṭhangthar leh pawl hrang hrangte'n nungcha len ramngaw humhalh nachang hre thar a, hma an la chu lawmawm a tih thu sawiin, "Mizoram hi biodiversity lama India rama sang ber pawl a ni a, hengte hi mihring tan a ṭangkaiin a hlu a, kan state hmasawnna atan a thil pawimawh tak pakhat a ni tih hriaiin, kan tualṭo thing leh mau leh hnim te hi humhalh nachang kan hriat thar a ṭul," a ti.

Kângmei vên lamah hmasawn zel a pawimawh thu sawiin Lal Thanhawla chuan, "Kawng sira huan leh lo neite pawhin roadside reserve zuah tur chin a awm tih an hriat a ngai," a ti a; Green Mizoram hnuaia hmalakna chu ṭhangtharte tan a nih thu a sawi.

Chief Minister hian kângmei venna kawnga district ti ṭhate leh Aizawl district chhunga meikawng sial ṭha khuate hnenah 'Fire Prevention Award' a hlan a; kângmei ven kawnga district ti ṭha ber chu Lunglei district a ni a, pahnihna Mamit district niin, pathumna Serchhip district a ni.

Aizawl district-a kângmei venna kawnga ti ṭha ber khua chu Hlimen a ni a, pahnihna chu Rúlchàwm niin, pathumna chu Sàwleng an ni.

Green Mizoram Day hawn inkhawm kaihruaitu chief secretary Arvind Ray chuan, district hrang hranga Green Mizoram Day hman chuan hun la kal zel turah rah ṭha a chhuah ngei a beisei thu a sawi a, "Khawvel thar leh nuam zawk siam tura ke pênna a nih avangin a lawmawm hle," a ti.

Green Mizoram Day pual hian Chite lui kamah thing phun nghal a ni a, sorkar department hrang hrang aṭanga volunteer-te'n hmun bik ruahmanah thing an phun bawk. State Level Committee chuan kumin Green Mizoram Day thupui atan 'Thingphun belh la, a awm sa humhalh rawh' tih an thlang.

Inkhawma tarlan danin, thing ṭiak phunte ngaihvena enzuitu Monitiring & Evaluation Committee chu kum 2014-ah din a ni. Kum 2017 khan thing ṭiak 24,342 phun a ni a, a thlawnin 77,535 sem a ni bawk a; chungte aṭang chuan 81.45% a dama ngaih a ni.

Green Mizoram Day hawnnaah hian minister pathum - R Romawia, Lalsawta leh H Rohluna, deputy speaker R Lalrinawma, MLA pali - Lalrinmawia Ralte, Dr Ngur­dingliana, Lt. Col. ZS Zuala leh Dr BD Chakma te pawh an tel.