VANGLAINI ZIRCHIANNA ; KṬP General Conference leh HSLC result

Mizorama kohhran ṭhalai inkhawmpui lian ber, KṬP General Conference neih leh HSLC exam hi a inrual chang a awm ṭhin.

KṬP General Conference thlengtu khuate'n mikhual an ngah ṭhin a, mikhual 100 chuang neite pawh an awm ṭhin. Hei vang hian a thlengtu khuaa zirlaite zirna a khawih buaia ngaihna te, a hma lama inbuatsaihna nasa tak neih a ngaih vang leh mikhual thlen tlaia mikhual sem tura zirlai naupangte hman an nih ṭhin avangin matric result pawhin a tawrh phaha ngaih theih turin sawi a awm fo.

Vanglaini chanchinbu chuan tun hnaia HSLC result leh KṬP General Conference thlengtu - Mamit, Thenzawl, Khawzawl, Champhai leh West Phaileng khuaa high school hrang hranga HSLC result-te a zir chiang a ni. Zirchiannaa a lan danin, KṬP General Conference inbuatsaihna leh conference laia chhehvel boruak avangin a thlengtu khuaah hian a tlangpui thuin matric result a chhiat phah loa hriat a ni a; chutih rualin, sikul malah conference kum leh result chhiat kum innang fuhte an awm tel bawk.

West Phaileng
Kumin 2018-a KṬP General Conference chu March 1-4 chhungin West Phaileng-in an thleng a, conference hun hi HSLC exam hun lai nen a innang fuh chiah a ni.

West Phailengah hian HSLC candidate nei sikul pathum a awm a; West Phaileng H/S leh BCM H/S-ahte conference neih kum hi HSLC result ṭhat ber kum a ni lo nâin, a chhiat ber kum pawh a ni chuang lo. Gospel Centenary H/S-ah erawh chuan kum 2013 leh a hnu lama result hmuh theih chinah conference thlen kum hi result chhiat ber kum a ni thung.

Champhai
Champhai khawpui chuan March 3-6, 2016 khan KṬP General Conference an thleng a, khawpui lian pawl tak ni mah se, khawpui pumpuiin an inthlen ṭâwm a ni. Champhaiah hian HSLC candidate nei sikul 11 a awm a, chu'ng zingah chuan khawmpui pandal hnaih ber zinga mi, Bethel Mission School chuan Conference neih hma kum te, conference neih kum leh a hnu kumahte result a danglam lo a, 100% pass an nei zel.

A tlangpui thuin, KṬP General Conference neih kumah result a chhe bik lem lo a, sikul ṭhenkhatah chuan result a ṭhat kum takte pawh a ni. Chutih rualin, a hma kum leh a hnu kum aia conference kum taka result nei chhia sikul - GM H/S, Vengsang H/S, King Solomon's H/S leh Tlangsam H/S-te an awm a; King Solomon's H/S phei chuan conference kum takah pass percentage 86.36% chiah an nei laiin, kum dangah chuan 100% an nei a ni. Champhai H/S pawh conference kum aṭangin a hnu lamah result a chhe zui hle bawk.

Khawzawl
KṬP General Conference vawi 55-na chu February 27 - March 2, 2014 chhungin Khaw­zawlah nghah a ni. Khawzawlah hian high school pathum - Khawzawl H/S, Far-East Experimental School leh Presbyterian English School-te a awm.

Khawzawla English medium school-te chuan result an nei chhe ngai lo a, tun hnai kum nga chhung hian Presbyterian English School phei chu 100% result an nei ziah a ni. Far East Experimental School-ah kum 2011 khan HSLC-ah 66.66% an pass a, hei hi tun hnai kum nga chhunga an pass chhiat ber ni mah se, kum dangah erawh an pass percentage a ṭha tlangpui.

HSLC exam-a Khawzawl H/S tihchhiat ber kum 2010-ah 56% an pass a, kum 2013-ah pawh 53.33% an pass. KṬP General Conference an thlen kum, 2014-a an HSLC pass percentage chu 81.63% a ni a, first division-ah mi pali an lang.

Thenzawl
Kum 2012-a March 1-4 chhunga KṬP General Comnference vawi 54-na neihna Thenzawl khuaah high school pathum - Thenzawl H/S, Vantawng H/S leh Lallengvunga H/S-te a awm. High school pathuma kum nga chhunga HSLC result zirchiannaa a lan danin, KṬP General Conference an thlen kum, kum 2012-a HSLC result-ah, Thenzawl H/S-ah 85.71% an pass a, Vantawng H/S-ah 81.25% leh Lallengvu4nga H/S-ah 58.62% an pass.

Hetih lai hian, Lalengvunga H/S bikah chuan, inkhawmpui lian an thlen hnu kum, 2013-ah HSLC result chu 50% leh 2014-ah 40% a ni a; kum 2015-ah erawh chuan 93.33% an kai thung.

Mamit
March 4-7, 2010 chhung khan Mamit khawpuiah KṬP General Conference neih a ni a, Mamitah hian HSSLC candidate nei Mamit H/S, Mamit H/S-II leh St. Francis of Assisi School-te an awm. Heng H/S pathumte result hi zirchian a ni a, H/S dangte chu kum hmasa lamah din a la nih loh avangin telh an ni lo.

Sikul pathum aṭang hian zirchianna hi a kima a lan theih tho avangin zirchianna atan hman an ni a. Kum 2010-ah hian Mamit H/S-ah 88% an pass a, Mamit H/S-II ah 80% pass in, St. Francis of Assisi-ah 100% an pass. Hemi kum bik en phei hi chuan, KṬP General Conference hian result a nghawng loa ngaih theih a ni a; St. Francis of Assisi hian kum 2013-ah 88.88% an pass tih loh chu kum nga chhung hian 100% result an nei vek a ni.