Environmental Policy fel tak kan nei - Lalduhoma

Zoram Peoples' Movement (ZPM) chief ministerial candidate Lalduhoma chuan, Mizoramin tun thlenga Environment Policy a la nei lo chu mak a tih thu a sawi a; ZPM chuan ramngaw humhalh dan tur leh khaw tina social forest neih dan tur leh enkawl dan turah Environmental Policy fel tak an duang tawh niin a sawi bawk.

Nimina ZPM pisaa inkhawm­ah Lalduhoma chuan, nimin June 11 chu Green Mizoram Day a nih thu sawiin, "Ramngaw humhalh kawnga thawktu environmental organisation hrang hrangte leh NGO-te hnenah lawmthu kan sawi a, tun thlenga Mizoramin Environment Policy kan la nei lo hi a mak hle a ni," a ti a; ZPM chuan Environmental Policy mumal tak an nei tawh tih a sawi.

Lalduhoma sawi danin, ZPM-in Environmental Policy an duan tawhah chuan thing phun belh dan tur te, thing phunsa humhalh dan tur te, road side reserve neih dan leh enkawl dan tur te, a kenkawh dan tur te, luipui dung ram ṭha aṭanga tlang sang lama forest sawn dan tur te, khaw tina social forest neih dan tur leh a enkawl hna khaw mipui kuta dah dan turte fel takin an duang tawh a ni.

Development policy reng reng a tlo tur a ni tih sawiin Duhoma chuan, sustainable economic policy-in thil chi thum - eizawnna tlak, mi dangte leh society tana ṭha lo leh hnawksak a ni tur a ni lo, tih leh environment tana pawi thei chi a ni tur a ni lo, tih a ken tel thu a sawi a, "Hemi huang chhungah hian ZPM chuan Economic Policy a duang a ni," a ti.

Lalduhoma chuan, India ramah forest area 21.54% lek a awm laiin, Mizoramah chuan forest covered area 86.7% lai a awm tih sawin, "India ramah pakhatna kan ni. Global warming, Green House Effect leh Green India-ahte hian a thawh hlâwk ber kan ni a, chhuan tur kan neih ve chhun a ni," a ti a; 14th. Finance Commissioner-in state tinte sum insem dan tura tehfung a hmanah forest area 7.5% bituk a siam chu 10%-a tisang turin 15th. Finance Commission-ah an thlen tawh tih sawiin, a hlawhtlin chuan Mizoram budget-in a san phah hle dawn tih a sawi.

ZPM CM Candidate chuan, ZPM-in sorkarna a chan huna kalphung a inthlakthleng dan tur point hrang hrang 41 leh mipui sorkar siam dan tur point hrang hrang 11 a sawifiah bawk.