MIGLAHSSA-in June 17 thleng sorkar nghâk dawn

Mizoram Govt. Lumpsum Aided Higher Secondary School Association (MIGLAHSSA) chuan, adhoc aided-a hláng kai tura sorkar an ngennaah, June 17, 2018 thleng Mizoram sorkar thu ngaihchân a, chumi chhunga thu lawmawm an hriat loh chuan June 18, 2018 aṭangin tiam chin awm loa sikul khâr an tum.

MIGLAHSSA thuchhuah chuan, Mizoram puma an member sikul pakuate chu khawtlang enkawl mek an ni tih sawiin, "Mamawhna a san em vanga khawtlang ṭangrualin kum 2004 leh a hma lama an din tawhte a ni a, kum 14 chuang khawtlangin sum leh pai thawhkhawma an lo enkawl tawh a ni," an ti.

MIGLAHSSA tarlan danin, adhoc aided status-a hlan kai an phûtnaah hian vawi tam tak sorkar thuneitute hnenah ngenna an thlen tawh a, mahse, thu lawmawm an hmu thei lo. June 7, 2018 khan Demand Day hmangin, sikul kal chungin lehkha an zirtir lo a; Demand Day an hman hnuah pawh thu lawmawm an hmuh loh avangin, June 17 thleng ngaihchân a, chumi chhunga thu lawmawm an dawn loh chuan June 18 aṭangin tiam chin awm loa sikul khâr an tum a ni. An tum dan hi nimin khan School Education Minister hnenah ziakin an thlen bawk.

Sikul tihchangtlun chungchanga sorkar rilru - ‘A awm sate thawm ṭhat leh tihchangtlun’ tih chu ṭha an ti a, an ṭâwmpui thu an sawi rualin MIGLAHSSA chuan, "Kan khua aṭang hian a awm sa tihchangtlun tur sorkar HSS-te hi km. 168 te, km. 100 zeta hláte a ni hlawm a, thingtlang mi harsa zawkte tan a hla lutuk a, kan chhawr phak ve lo a ni," an ti.

MIGLAHSSA chuan, thingtlanga mi harsa zawkte'n zirna changtlung zawk an neih theih nan sorkarin hma a lak ngei an beisei thu sawiin, "Mi harsa tê tête'n an fate fee bakah, sikul enkawlna tur thawh a, harsa taka an pek ṭauh ṭauh hi sorkhar hian a hriatpui ngei kan ring a, a thlawna zirna an hmuh theihna kawng dappui a, adhoc grant in aid status-a min hlan kai hi hmalakna hmasaa an neih ngei kan ring," an ti a; an harsatna leh mamawhnate chu sorkarin a tihhlawhtlin ngei an ring thu an sawi bawk.