Lei min leh khi vangin kawng ping

Niminah Mizoram hmun hrang hrangah nilengin ruah a sûr a, hmun ṭhenkhatah lei a min a, lei khiin kawngpui a tihbuaite a awm bawk. Nimin chawhnu dar 1:00 vel khan Sairang aṭanga Mualkhang thlen hmaah kawng chhak lama lei tawlhin NH-54 kawngpui a hnawh ping a, lirthei kal tlang theih a ni lo.

PWD chief engineer K Lalsawmvela hnen aṭanga thu dawn danin, Mual­khanga NH-54 kawng­pui hnawhtu hi Railways-in rel kawng tur an laih vûng vanga min niin a lang a; nimin khan thenfai hna thawh nghal niin, tlaiah lirthei kal tlang theiha siam hman beisei a ni.

Republic Veng field chhaka kawngpui pawh a khi leh a, hei vang hian fimkhur thilah he kawngah hian lirthei kaltlang phal a ni lo. Pathianni zan khan Lawngtlai district-a Thingkah bulah leiminin NH-54 kawngpui a hnawh bawk a, nimin khan lirthei kal tlang theiha thenfai a ni.