KHAWTHLIR

CYMA-in ngen
Central YMA chuan June 4, 2018 tlaia Lunglawn, Lungleia leiminin in a hnâwl neitu H Vanlalpeka leh in chima thi mi 10-te ṭanpui nan Aizawl khawpui chhunga YMA branch tinte chu ṭanpuina sum thawh turin a ngen. CYMA chuan, mimal leh pawlte dangte tan pawh ṭanpuina pe duh tan CYMA kaltlanga pek theih a nih thu an tarlang bawk.

NEDP thlirho
NEDP Monitoring & Evaluation Committee chu nimin khan an chairman H Liansailova hoin Directorate of Economics & Statistics committee room-ah an ṭhukhawm a, NEDP kalpui meka a kaihhnawih department hrang hrang 29 hotute an tel a, NEDP hnathawhte an thlirho a ni.

Thisen pe
Tlangnuam West Branch YMA chuan, YMA Day lo thleng tur pualin nimin khan blood donation camp an huaihawt a, Aizawl Civil Hospital tan an member mipa 27 leh hmeichhia pangate'n thisen unit 32 an pe. Thenzawl Pastor Bial PYD (NEI) pawhin nimin khan Serchhip District Hospital tan thisen unit 42 an pe a, a petute mipa 33 leh hmeichhia pakua an ni.

MJA-in sún
Kohima Press Club president Xavier Rutsa chu nimin zing khan a thi a, Mizoram Journalists' Association (MJA) General Headquarters chuan sûnna thu an thawn. MJA chuan, Xavier Rutsa thihnain MJA a barakhaih thu sawiin, "Xavier Rutsa thihna hi India hmarchhaka journalist te, a bik takin Nagaland-a journalist-te tan chânna nasa tak a ni," an ti a; a kalsan a chhungte Pathianin awmpuiin thlamuan se an duh thu an tarlang a ni.

Governor Bân turin ngen
PRISM party chuan nimin khan President Ram Nath Kovind hnenah lehkha an thawn a, Mizoram Governor Kummanam Rajasekharan chu bàn turin an ngen. PRISM hian Governor hi an duh loh avangin a duh lo ve dangte hming lak khawm, signature campaign an nei a, mi 53,167-in hming an ziak niin an tarlang. President hnena lehkha an thawn hi Governor hnenah an pe a ni.