Mau chi leina turin Covid-19 dona pawisa a tibuai lo - Horticulture Dept

Horticulture depart­ment chuan thuchhuah siamin, mau chi supply-tu tur zawnna atana tender an chhuah chungchang an sawifiah a,  "Mau chi leina turin Covid-19 dona tur pawisa a tibuai lo," an ti.

Horticulture depart­ment tarlan danin, Model Bamboo Plantation atan Mamit district-a Hmun­pui Ieh Lengpui thlan a ni a, a tirah mi 250 tan ruahman ni mah se, ṭhen­khatin inbuatsaih nan hun tam zawk an mamawh avangin mi 226 thlan a ni. Mau chíng tur thlan danah duhsak bik awm loin, sorkar ruahmanna anga phûr tak Ieh taima taka chíng thei turte thlan a ni. 

Model a nih angin department-in khauh takin a kalpui a, a hmunah kala endik vek a ni a; tun dinhmunah ṭha taka hma la chu chhungkua 209 an ni. An hmalakna chin ang zelin ṭanpuina pek an ni tawh a, hmalak zelna tur pawh department-in a ruahmansak.

Model Bamboo Plantation programme hi Covid-19 hripui lèn hma, kum bul lam aṭanga kalpui tawh a ni a, ṭanpuina pawh lo vah nan, mangkhawh nan, thlám sak nan leh khur laih nante a dawngtu turte hnenah an hmalak dan ang zela pek a ni tawh. Mau chu phun hunbi nei a nih avangin a phun hun a pelh chuan kum pumpui hlohnaah sorkar chuan a ngai.

Hripui léng karah pawh mau chíngtuten kum an hloh lohna turin mau phun tur ngaihtuah a ngai a; a chíngtute hnenah mau chi pek a nih theih nan Finance department-in The Mizoram Public Procurement Rules, 2020 (Procurement of Goods, Works and Services) a siam angin tender chu sorkar phalnain koh a ni.

Tender kohna lehkha copy chu Chief Minister, Additional Chief Secretary, Bamboo Development Board Vice Chairman, etc. pek a ni. Tender chhuah tur chu IPR Director hnenah dan ang thlapa thawn a ni a, The Zozam Times, Vanglaini Ieh The Aizawl Post-ahte chhuah a ni. Mi tam zawkin an hriat theih nan Ieh an hmuh theih nan department website www.horticulture.mizoram.gov.in ah dah a ni bawk.

Khawvelin hripui léng a buaipui laia kut hnathawktute Ieh department-in intodelhna tura theihtawpa hma an la chu lawmawm an tih thu tarlangin Horticulture department chuan, "Model Bamboo Plantation atan hian SEDP Ieh National Bamboo Mission (NBM) pawisa converge (pawh kawp) a ni a, mau chi leina tur pawh hi NBM 2019-2020 sum aṭanga ruahman sa vek a nih avangin Covid-19 dona tura pawisa rua­hman tihbuai a nei lo," an ti.