KHAWTHLIR

Sikul chawlh
School Education department chuan nimin khan circular a tichhuak a, nimin chawhnu leh vawiin hi sikul chawlhah a puang. Circular-a tarlan danin, National Weather Forecasting Centre, India Meterological department-in June 12-13 chhungin hmarchhak state leh hmun dangah nasa taka ruahsûr tura a tarlan avangin, Mizorama zirlaite himna atan sikul chawlh hi puan a ni.

Road divider pêla tlân khap
Traffic SP H Ramthlengliana chuan thuchhuah siamin, Aizawl khawpuiah double overtaking leh road divider pêla mahni tlânna lane ni loa lirthei tlan chu danin a khap thu a tarlang a, "Hetianga tlan hian mi dang lirthei khalhtute a tibuai a, mahni tan a him lo. Double overtake leh road divider pêla lirthei khalh ṭhin man chhuahte chu khauh zawkin dan anga hrem an ni tawh ang," a ti.

Energy remchem inzirtirna hawng
Energy renchem pawimawhna inzirtirna hun, 'Model Energy Efficient Village Campaign' chu nimin khan Zawlnuam Ṭhuampui community hall-ah buatsaih a ni. Model Energy Efficient Village Campaign hnuaiah hian Zawlnuam khuaah power heh lo LED bulb 4,000, LED tubelight 1,000 leh LED streetlight 25 vuah thar a ni.

Thisen pe
Mizo Chelsea Supporters Club chuan, nimin khan Aizawl Civil Hospital-ah thisen unit 12 an pe a, a petute mipa 10 leh hmeichhia pahnih an ni.

MPCC-in tawrhpui
MPCC chuan thuchhuah siamin, tun hnaia ruahsûr nasa vanga Zoram hmun hrang hranga khuarel chhiatna leimin, in chim, tui lian leh inkalpawhna kawngpui chhiahte vanga mipuite'n harsatna an tâwk chu pawi an tih thu an tarlang a, "Harsatna tâwk zawng zawngte kan tawrhpui tak zet a ni," an ti.