Huaisen lawmman mi panga hlân

Nimin khan Secretariat conference hall-ah huaisen lawmman Jeevan Raksha Padak Award, 2017 sem a ni a, award hi mi pangana hnenah hlan a ni.

Award sem inkhawm hi Home secretary Lalnun­mawia Chaungo-in a kaihruai a; khuallian Home minister R Lalzirliana chuan, "Mite tana nunna pe ngam, ṭhian chhan thih ngam mi huaisente'n chawimawina an dawng a ni," a ti.

Huaisen chawimawina hi chi thum sem a ni a; chu'ngte chu - Rs. 2,00,000 keng Sarvottam Jeevan Raksha Padak Award, Rs. 1,50,000 keng Uttam Jeevan Raksha Padak Award leh Rs. 1,00,000 keng Jeevan Raksha Padak-te a ni.

Chawimawina dawngtute
Lalchhandama (17), Tuikual South: May 7, 2017-ah Tlawng luiah a kalpui C Lalremkima leh Lalmuansanga te tuitla a chhanchhuahna lamah a thi. Mahni nunna hlana huaisenna a lantir avangin Sarvottam Jeevan Raksha Padak Award hlan a ni a, a nu leh pain an dawng.

B Laltlanthanga (52), Khatla: August 16, 2017-ah B Laltlanthanga leh a ṭhian palite nen Tuirial kam ramhnuaiah kalin mau an sat a, luia mau pûm lian phuar khawm lak tum a ṭhiante Lalnun­tluanga, Lalrinawma leh Sangliana te chesual, tuia tla hlum tur a chhanchhuak. Mahni nunna thàpa mi a chhanchhuah avangin Uttam Jeevan Raksha Padak hlan a ni.

Zonuntluanga (16), Sialhau, Serchhip district: August 20, 2016-ah Zonuntluanga hi a pa K Lalthanpuia nen Char ngaw ram, Sialhauah chawhmeh zawng turin an ram chhuak a, an haw kawngah savawmin a pa chu a lo bei thut a, hliam na tak tuara a awm laiin Zonuntluanga hian chempui nen chauh savawm a bei let a ni. Hei vang hian Zonuntluanga hi Uttam Jeevan Raksha Padak hlan a ni.

Lianhmingthanga (21), Rengtekawn, Kolasib district: May 7, 2016-ah Lianhming­thanga hi a ṭhiante patuum nen Chem luiah an kal a, lui an dai kainaah a ṭhiante chu an chesual a; Lianhmingthanga hian a ṭhiante pathum - Lalduhawmi, Lalpiangmawii leh Nianglami te chu a chhan chhuak. A huaisenna avang hian Uttam Jeevan Raksha Padak hlan a ni.

Zairemtluanga (16), Cham­phai Kahrawt: August 2, 2016-ah in chhawng lina tukverh, ft. 22 vela sang aṭanga naupang Jordan Malsawmdawngfela tla, leia insawha step âwih taka lum mai tur chu Zairemtluanga chuan ama tana hlauhawm tur pawh pawisa loin a lo dawng a, nunna hlu tak a chhan avangin Jeevan Raksha Padak Award hlan a ni.