Champhai dist. hmasawnna hnathawh thlirho

Champhai District Deve­lopment Co-ordi­nation & Monitoring Committee chu nimin khan an chairman CL Ruala, Lok Sabha MP leh co-chairman Ronald Sapa Tlau, Rajya Sabha MP hoin an ṭhu a, sorkar laipui scheme hnuaia hmasawn-na hnathawh an thlirho.

CL Ruala chuan, Cham­phai district-a department hotute chu ṭhahnemngai taka thawk tur leh mipui tana rotling, nakin thlenga chhawr ṭangkai theih tur chher tum turin a chah a, "Sor­kar hnathawkte hi an kutah district mai bakah, Mizoram hmasawnna a innghah tlat avangin rinawmna, taimakna leh huaisenna thinlung pu chunga hnathawh a ngai," a ti.

Meeting-a tarlan danin, Champhai district-ah hian MGNREGA hnuaiah kum 2017-18 chhungin job card nei mi 28,414 hnenah ni 66 inhlawhna siam a ni a; kumin 2018-19 chhungin inhlawhna siam a la ni lo a, ni 28 inhlawhna tur job card nei mi 28,549 tan siam ni tawhin, ni 76 aia tlemlo inhlawhna siam tum a ni.

PMAY-G (Rural Hou­sing Scheme) hnuaiah beneficiary mi 146 hnen­ah in sak ṭanpuina pek a ni a, in 75 sak zawh a ni tawh. Swachh Bharat Mission (Urban) hnuaiah Swachh Survekshan kaltlangin kawng hrang hranga fai zirtirna hmalak a ni a, Rohmingthanga Re­creation Centre (Kahrawt) chu Zero Litte­ring Zone a puan niin, Biate chuan North East bikah Best Practice and Innovation Award an dawng.

National Health Mi­ssion hnuaiah kum 2018-19 first quarter chhung­in nau piang dam ṭha 140 an awm a, nausen thi 3 awmin, IMR chu 21.42 a ni a, nau chunga nu thi an awm lo. Mi náwlpuia thisen test mi 442 zinga 14 chu HIV positive an ni a, nu nau pai thisen test 235 zinga pathum chu HIV positive an ni tih hmuh chhuah a ni.

Meeting-ah hian Cham­phai district-a MLA pathum - Lalrinliana Sailo, TT Zothansanga leh T Sang­kungate pawh an tel a ni.