Social media hman dan zirna buatsaih

State Agriculture Ma­na­gement & Extension Trai­ning Institute (SAMETI), Mizoram leh Extension Education Insti­tute (NE Region), Ministry of Agriculture & Far­mers’ Welfare ṭangkawpin ni thum awh tur, ‘Off-Campus Training on Use of Social Media & Video Producton Skills for Agriculture Extension’ an buatsaih chu nimin khan Agriculture conference hall-ah IPR director David L Thangliana'n a hawng.

David L Thangliana chuan, tunlai khawvelah social media a pawimawh tih sawiin, "Tu pawhin mahni mobile phone hmangin chanchin thar ber, a chhia a ṭha pawh, a thlen rual rualin khawvel pum hriatah a thawn chhuak thei tawh. Chuvangin, mi tin hi social media chak lutuk hman kawngah kan fimkhur a ngai a ni," a ti.

Tun hnaia ruahsûr leh thli vanga Mizoram hmun hrang hranga chhiatna thleng chungchang pawh social media hmanga inhrilh zung zung theih a ni tih sawiin IPR Director chuan, "Ṭangkai taka hmang an awm laiin, ṭhen­khatte chuan kum danga thlalak hluite theh­darhin mipui tichiai zawnga thil an ti duh ṭhin," a ti a; social media hmanga mipui tihder/tichiai lo turin mipui a ngen.

SAMETI director RK Nithanga chuan, "SAMETI, Mizoram hi kum hnih a ding tawh a, tunah hian director pakhat leh faculty palite'n an enkawl mek. Agriculture leh a kaihhnawih depart­ment - Horticulture, AH & Vety, Fisheries, Seri­culture leh Soil & Water Conservation-te tana training hmun pawimawh tak a ni," a ti.