KHAWTHLIR

Taiwan sorkar chuan Mizoram hman tur advanced RT-PCR leh hmai tuamna a thawn dawn tih Mizoram sorkar thu­chhuah chuan a tarlang. Hmanruate hi vawiinah Taiwan aṭangin Delhi Mizoram House thlenpui beisei a ni. Taiwan sorkarin a rawn pek hi Rs. 15,00,000 man medical mask, N95 mask leh Rs. 45,00,000 hû Meiho University, Taiwan-in a thawh advanced RT-PCR test kit a ni.

Nimin khan Chhinga Veng Branch YMA chuan kumina YMA Day (June 15) pual­in an YMA Hall-ah blood donation camp an huaihawt a, mipa 90 leh hmeichhia 13-te'n Aizawl Civil Hospital tan thisen unit 103 an pe. Ruantlang Branch YMA pawhin YMA Day leh World Blood Donor Day (June 14) pualin Champhai District Hospital-ah thisen pek rûnpui an buatsaih a, mipa 42 leh hmeichhia 10-te'n thisen unit 52 an pe a ni.

Mizoram Kohhran Hruaitute Committee (MKHC) chuan thu­chhuah siamin, Mizorama kohhran hrang hrangte'n an hmunhma, Covid-19 hripui léng vanga Mizoram páwn aṭanga hawte inkhung hranna atana an hmantir chu lawmawm an tih thu an tarlang a, "Local church-te'n a remchan dan anga sorkar thuneitute lo ṭawiawm zel turin MKHC chuan a beisei a ni," an ti.

Chief secretary Lalnunmawia Chuaungo hoa June 11, Ningania sorkar hotute leh Aizawl City Local Council Association hruaitute ṭhukhawm chuan, total lockdown chhungin Aizawl Municipal Corporation huam chhungah Inrinni-ah chawhmeh, thlai leh thei zuara kawngpui sira inpho phal loh ni se, ni dangah chuan local task force-te ruahman angin chawhmeh zawrh phal ni se, an ti.

June 8 aṭanga neih ṭan Lai Autonomous District Council (LADC) budget session chu nimin khan a ṭiak a, kum 2020-21 budget atan cheng nuai 18,986.91 an pawm. Nimina session-ah LADC chief executive member T Zakunga chuan budget pharhin, budget an ruahman dan tlangpui a sawifiah a ni.

Magic Bus India Foundation, Mizoram State chuan Azeem Premji Philantrophic Initiatives Scale Project aṭanga Covid19 Relief Distribution Fund an hmuh hmangin nimin aṭang khan 

ṭanpuina an sem ṭan a, Aizawl khawpui chhunga veng pasarihah an sem ang. Ṭanpuina hi chhungkaw pakhat hnenah buhfai kg. 15, tel litres 4, dal kg. 4, inbual leh insukna sahbawn 6, chi kg. 1 leh aieng pack 1 ṭheuh pek tura ruahman a ni.

Hnahthial damdawi-ina thawktute chuan nimin khan medical officer Dr Lalrengpuii Ralte kaih­hruaiin OPD building-ah Covid-19 dona tura tih tur pawimawh inhriattirna leh infuih tharna hun an hmang a; quarantine facility leh covid care centre kalpui dante an zirho bawk.