Sorkar hnathawk hlawh pûksak tur Sum enkawl thiam loh vang - MPCC
Mizoram Pradesh Congress Committee (MPCC) Media department chuan nimin khan Aizawl Press Club-ah thuthar thehdarhtute an kâwm a; Mizoram sorkarin a hnathawkte hlawh thla thum chhung a pûksak tur chu MNF sorkarin sum a enkawl thiam loh vangah an puh.
MPCC Media chairman Dr Lallianchhunga chuan, sorkarin a hnathawkte hlawh a pûksak tur chu MNF sorkarin sum leh pai a enkawl thiam loh vangah Congress party-in an ngai tih sawiin, "Sum leh paia harsatna a tawhte Covid-19 hri léng vanga an puh vek mai leh sorkar hnathawkte hlawh batsak a ngai ta hial mai hi engti kawng maha pawm theih lohah kan ngai," a ti.
Mizoram sorkar chu Covid-19 dona kawngah sum leh paia harsatna chhuanlam ngam tur an nih loh thu sawiin Lallianchhunga chuan, "Central sorkar aṭanga sumfai ṭanpuina a dawn ringawt pawh hi cheng vbc. 34 chuang a ni tawh," a ti a; khawtlang, kohhran, sorkar hnathawk pawl leh mimalte'n CM Relief Fund-a an thawh khawm tawh ringawt pawh cheng nuai 700 chuang a nih tawh thu a sawi.
Congress party Media Chairman sawi danin, MLA 35-te'n MLA fund cheng nuai 50 ṭheuh an thawh khawm tur ringawt pawh cheng vbc. 17.5 a tling dawn. Finance department tarlan danin, sorkar hnathawk hlawh pûk ṭhen tur aṭangin thla tin cheng vbc. 30 hmuh beisei a ni a, thla thum chhungin cheng vbc. 90 vel hmuh beisei a ni.
MPCC Media-te sawi dangte
Mizoram sorkarin kum 2020-21 budget-a sorkar laipui aṭanga scheme/project lo kal do lêtna tur cheng vbc. 200 leh PAHOSS atana cheng vbc. 10 a dah tawh chu a hmanna tur siam ṭhain, sorkar hnathawkte hlawh hrênsak lo pawhin Covid-19 do lêtna atan Mizoram sorkarin inrenchemna tur a kalpui thei. Sorkar laipuiin CSS thar kumin financial year chhungin a tihtawp rih avangin state-in a do lêtna atana dah cheng vbc. 200 chu a hmanna tur dang ruahman a ngai hrim hrim.
Kum 2020-21 budget hi Covid-19 nghawng do lêt tur zawngin Chief Minister hian tidanglam turin thuneihna bik a nei. CM hi Finance Minister a nih bawk avangin harsatna a tâwk dawn lo a, Cabinet pawmpuina pawh a ngai lo. Chutianga sum hman dan tihdanglamte chu Supplementary Demand hmangin House-in a pawmpui leh thei.
MNF sorkar hian sum leh paia harsatna a tâwk tak tak a nih chuan central sorkar tih angin, hma thar lakna reng reng a titawp vek tur a ni. Chutih laiin, sum luan ralna tur ringawt an la buaipui a, sum tam tak luan ralna PSU-te a tuai thar zawk.
Zirtirtu sem rual lam hawi hmasa loin zirtirtu 800 chuang an la ringawt a, thla tin cheng nuai tam tak luan ral mekna board hrang hrang 14 a din ringawt bawk.
Motor thar tam tak an lei a, officer lian zawng zawng laptop leh phone changkang an leisak.
Chhángtu tur pakhat chauh a awm tih hriat sa, mau supply-na tur tender chhuah a tím chuang lo.