Fimkhur takin MLP Rules kan zir chiang - Deputy Chief Minister
Mizoram sorkarin Mizoram Liquor Prohibition (MLP) Rules zir chiangtu tur committee a dina chairman Tawnluia, deputy chief minister chuan, zir chian hna fimkhur taka an kalpui thu a sawi.
Vanglaini palai zawhna chhangin Tawnluia chuan, MLP Rules zir chianna an zawh hun tur hriat theih a la nih loh thu a sawi a, "Pawl hrang hrang aiawhte committee-ah an tel a, chung ho chuan kan thurêlte chu an páwlah pu lut lehin, meeting leh hnuah an pawl ngaihdan an rawn thlen leh ṭhin a ni," a ti.
Tawnluia chuan, committee ṭhutkhawm leh a hun tawh thu sawiin, "Committee member ṭhenkhat Tuirial bial MLA by-election-ah an campaign lo thei lo a, tunah chuan inthlan a zo tawh a, a rang lama ṭhutkhawm a ngai," a ti a; ṭhutkhawm hun tur erawh sawi theih a la ni lo tih a sawi.
Deputy Chief Minister chuan, MLP Rules chu uluk leh fimkhur taka ngaihtuah a nih thu sawiin, "Pawl hrang hrangin ngaihdan an neihte thlir chungin rules ṭha tak duan chhuah kan tum. Kan ṭhutkhawm leh hunah pawh pawlin thu ken an rawn nei leh ang a, chungte chu thlirho leh a ni ang. Ṭhutkhawm leh pawh a ṭul mai thei a, sawi lâwk theih a ni lo," a ti.
Thu dawn danin, MLP Rules-ah hian Champhai leh Hnahlan vela grape chíngtute hmakhua ngaihtuahin, grape wine siam leh zawrh phal tumna a awma sawi a ni a, mahse, thutlukna siam a la ni lo.
Mizoram sorkar chuan kumin 2021 kum tir khan Mizoram Liquor Prohibition (MLP) Rules zir chiangtu tur committee a din a, Deputy Chief Minister-in a kaihruai a, ṭum hnih an ṭhukhawm tawh a ni.
Committee-ah hian Excise & Narcotics minister Dr K Beichhua chu vice chairman a ni a; member-te chu School Education minister Lalchhandama Ralte, IPR minister Lalruatkima leh Law & Judicial minister TJ Lalnuntluanga te an ni. Committee chu a ṭul angin Mizoram Kohhran Hruaitute Committee, Central YMA, MHIP leh MUP aiawhte sáwm tura tih an ni.
MLP Rules leh a kaihhnawih
1) Zu zawrh khapna dan, Mizoram (Liquor Prohibition), Act chu March 20, 2019 khan Assembly House-ah pawm a ni
2) MLP Rules chu December 19, 2019 khan notification hmangin chhuah a ni
3) December 19, 2019-a MLP Rules notification hmanga tihchhuah tawh chu sut leh a ni
4) MLP Rules thar duan leh a ni a, Covid-19 avanga Cabinet meeting neih hleih theih a nih loh avangin by circulation-a hman mai rawtna Chief Minister hnenah an thawn
5) MLP Rules hi 'by notification' hmanga tihchhuah tum ni mah se, December 29, 2020-a chief minister Zoramthanga hoa Cabinet meeting chuan ennawn leh phawt an rêl. Ennawn tur Deputy Chief Minister kaihhruai committee an din