Health Minister-in ZMC zirtirtute a kawm
Health & Family Welfare minister Dr R Lalthangliana chuan nimin khan Secretariat conference hall-ah Zoram Medical College (ZMC)-a hnamdang zirtirtute a kâwm a, ZMC hmasawn zel dan tur a sawipui.
Health Minister chuan, ZMC-ah zirna a ṭhat tâwk loh a hlauh thu sawiin, "Kum hnih/thum hnuah chuan first batch-te chu an chhuak tawh dawn a, mipuiin an quality kan hmu ṭan dawn. Zirlaite'n degree chauh ni loin, khawi damdawi-inah pawh thawk tlâk turin thiamna an neih a pawimawh a ni," a ti.
Covid-19 avangin ZMC chauh ni lo, medical college dangahte pawh nghawng a neih theih thu sawiin Dr R Lalthangliana chuan, "Hripui léng pawh a tlakhniam ve zel a beiseiawm. Mi inpe tak tak in ni a, in chhunzawm zel pawh ka beisei," a ti a, harsatna an neihte sawi turin ZMC zirtirtute a sáwm a ni.
ZMC director John Zohmingthanga chuan, hun harsa karah ZMC zirtirtute'n theihtawp an chhuah thu sawiin, "Hmanrua duhthusama kan nei ṭha lo chungin an ṭang hle a ni," a ti.
ZMC registrar Dr Jane Ralte chuan, kuminah ZMC building thar peih hman beisei a nih thu leh department hrang hrangte'n hmun tháwl leh ṭha zawk an neih theih tur thu a sawi.
ZMC-a zirtirtute chuan, theihtawp chhuahin zirlaite ṭha taka chher chhuak turin ṭan an lak zel dawn thu an sawi a; harsatna an sawi tlangpuite chu zirtirtu indaih lohna, building duhthusam tâwk lo leh hmanraw mamawh la neih kim lohte a ni.