Champhai Master Plan 2041 sawiho

Champhai Town Planning & Development Committee (CTPDC) chu an chairman TJ Lalnuntluanga, minister of state hoin nimin khan Champhai DC conference hall-ah an ṭhukhawm a; Champhai Master Plan 2041 buatsaih mek an sawiho.

TJ Lalnuntluanga chuan, Champhai Master Plan chu awmze neia Champhai khawpui tana hmalakna a nih thu sawiin, "Master Plan kaltlangin sum leh pai awm sa vek hmanga hmasawnna ruhrel thawh nghal char char tur tihna a ni lo a, Plan hi hmathlir thui tak neia duan, harsatna awm loa hmun ruat lâwk anga hmasawnna kalpui nghal a nih theihna tura duan lâwkna a ni," a ti a; Committee member-te inthlak hun a awm theih avangin inruahman lâwk a ngaih thu a sawi.

Mipui aṭanga rawtna leh thu thlen duhte an awm chuan ni 30 chhung hun hawn a nih dawn thu sawiin TJ Lalnuntluanga chuan, "CTPDC-in a pawm hnuah sorkar pawmpui turin nakkum January thlaa peih hman tum a ni," a ti a; a hranpain thuneitute pawmpui phawt a ngaih avangin Master Plan duan mekah North Khawbung, Ngúr leh Mualkawi khuate a tel ve loh thu a sawi bawk.

CTPDC vice chairman Maria CT Zuali, bawrhsap chuan, Champhai tichangtlung tura Master Plan puahchah mek chu khawpui ṭhang zel tur thlir chunga thil tihmâkmawh a nih thu te, ṭhangtharte dem an hlawh loh nan Champhai tana ṭha ber tur ngaihtuaha inràwn tawn a ṭul thu te, Champhai leilet zawl humhalh kawngah theihtawp chhuah mek a nih thute a sawi a; district mipuite chu thawhpuiah a sáwm.

UDPA Town & Country Planning Office-in kum 2020-a survey a neiha a lan danin, Champhai khawpuiah mi 43,375 vel an chenga chhût a ni a, kum 20 hnu (2041)-ah mi 64,555 an awm tura chhût a ni. Champhai Master Plan 2041 hmang hian Champhaia veng/khuate chu a zau zawng, mipui zat leh bit dan azirin zone 12-ah ṭhen a ni a; Champhai Revenue Town area sq.km. 47.8 a nih laiin, Champhai Master Plan 2041 huam chin tur zau zawng chu sq.km. 73.89 a ni.