PM scheme hrang hrang dik taka kalpui a nih theihna atan BJP-in hma lakpui turin Governor ngen

BJP, Mizoram Pradesh president Vanlalhmuaka leh an vice president Dr BD Chakma, MLA-te chuan November 8, Thawhṭanni khan Mizoram Governor Hari Babu Kambhampati an hmu a; Mizoramin mipui sorkar dik tak an mamawh tih hrilhin, Prime Minister scheme hrang hrangte a hmu tur dik takin an hmuh theih nan ṭan lâkpui turin an ngen.

Vanlalhmuaka leh Dr BD Chakma te hian central scheme hrang hrang, a bikin MGNREGA, PMAY (in nei lote in sak ṭanpuina), UJJWALA (free gas connection), PM-Kisan Niddhi Scheme (loneitute suma ṭanpuina), PM Health Care Scheme, Jal Jivan Mission, PMGSY, adt. Mizorama kalpui dan leh Mizoramin Covid-19 a tawrh nasat dante Governor an hrilh a ni.

BJP President chuan, PM scheme hrang hrangte a dawng tur dik takin an dawn loh thu sawiin, MNF hruai state sorkarin vote zawnna atan PM scheme-te chu an hman thu leh miretheite'n an chhawr theih loh thute a sawi a; Mizo mipuite chu discipline nei ṭha ber leh sorkar thu zâwm ṭha ber an ni chunga India rama hripuiin a tihbuai ber leh khawvela lockdown kalpui rei ber a nih thute a sawi bawk.

Dr BD Chakma chuan, Mizoram sorkarin 6th Schedule a palzût thu leh autonomous district council-te a ngaihsak loh thu a sawi a; 6th Schedule Amendment chungchangah hma lakpui turin Governor a ngen a ni.

BJP hruaitute thu thlente chu a ṭul anga lo enpuiin hma a lak dawn thu Governor chuan a lo hrilh niin BJP thuchhuah chuan a tarlang.