Covid-19 vaccine pek dan tur sawiho

Lawngtlai bawrhsap Dr Andrew H Vanlaldika hoin nimin khan DC conference hall-ah sorkar hotute'n Covid-19 danna (vaccine) pek lohna khua leh pek hmaihte hrût nawn tura Vaccination Mop Up kalpui dan tur an sawiho.

Dr Andrew H Vanlaldika chuan, sorkarin Covid vaccine pek a ngai pawimawh tih sawiin, thawktute chu ṭan la sauh sauh turin a fuih a, "Fûr laia inkal pawhna leh chhan hrang hrang avangin harsatna awm mah se, a theih dan dana hri danna pek hi kalpui turin mop up plan duan a ni," a ti.

Ṭhutkhawma tarlan danin, Lawngtlai district-a khaw 198 zinga 41 chu fûr laia tlawhpawh a harsat vang leh Covid-19 vaccine pekna hmun siam a rem loh avangin vaccine pe tura kal a la ni lo a; mop up-ah hian chu'ng khua zawng zawng bakah, vaccine la la kim lo khua zawng zawng pawh hrût chhuak vek turin ruahmanna siam a ni. Hemi rual hian Malaria Mass Screening kalpui tum a ni bawk.

January 19, 2021 aṭanga November 5, 2021 thleng khan Lawngtlai district-ah mi 55,021-in Covid-19 vaccine first dose an la tawh a, chu'ng zinga mi 26,773 chuan an la kim tawh. Dose hnihna lak hmabak mi 28,248 an awm a ni.

Lawngtlai district-ah hian kum 18 chung lam, Covid-19 vaccine la thei chin mi 82,359-ah la la lo mi 27,338 an awm a, vaccine la tawh chu 66.81% an ni.