India ramah hripui vei hmuh chhuah thar tam lama pathumna Mizoram

Mizoram chu India rama state 28 leh union territory pariat zingah November 8, Thawhṭannia Covid-19 vei hmuh chhuah tamna ber pathumna a ni a, Mizoram aia hmuh tamna Kerala leh Tamil Nadu-te chiah an awm.

Sorkar laipuiin nimin zing dar 8-a Covid-19 dinhmun a tarlan danin, November 8 khan Mizo­ramah Covid-19 positive 730 hmuh chhuah a ni a, Mizoram aia hmuh tamna Kerala-ah mi 5,404 leh Tamil Nadu-ah mi 841 hmuh chhuah a ni. Maharashtra-ah mi 693 leh West Bengal-ah mi 603 hmuh thar a ni bawk.

Covid-19 positive hmuh chhuah tawh aṭanga vei enkawl mek (active case) tam lamah Mizoram chu parukna a ni mek a; active case percentage-ah erawh Mizoram a la sáng fál a, 4.54% a ni. Mizoram dawta sang ber Kerala-ah 1.43% a ni a, state leh UT dang zawngah chuan 1% a tling tawh lo vek.

India rama state 28 zingah mihring awm zat aṭanga hripui vei hmuh tawh zat percentage san lamah Mizoram chu pathumna a ni mek a, Mizoram mihring zat 10,97,206 aṭanga Covid-19 positive hmuh tawh 1,25,861 chu 11.47% a ni. Percentage sànna ber Kerala-ah 15.03% a ni a, a dawttu Goa-ah 12.23% a ni thung.

Hetih lai hian, UT pahnih - Dadra and Nagar Haveli and Daman and Diu leh Lakhshadweep-ahte hripui vei enkawl lai an awm tawh lo. Hmarchhak state zingah Mizoram chu Covid-19 positive hmuh chhuah thar tamna ber a ni zui zel a, hmarchhak biala hmuh thar 1,120 zinga 730 (65.18%) chu Mizorama hmuh niin, Mizorama hmuh zat hi NE state dang pasariha hmuh zat belh khawm 390 aiin 340-in a tam zawk.

Covid-19 vei enkawl mek zat pawh Mizoramah an la tam ber a, hmarchhak state pariata active case 10,530 zinga 5,710 (54.23%) chu Mizorama mite niin, NE state dang pasariha enkawl mek belh khawm 4,820 aiin 890-in a tam zawk a ni.

Hmarchhak bialah Mizoram aia hripui vanga thi tlemna state pahnih - Arunachal Pradesh leh Sikkim chiah a awm a, state dang zawng chu Mizoram aia thi tamna a ni.