KHAWTHLIR

Thisen pe
Nimin khan Champhaia GM Higher Secondary School NSS chuan an sikulah Champhai District Hospital tan thisen unit 51 an pe a, petute mipa 31 leh hmeichhia 20 an ni. KM Higher Secondary School NSS-in an sikulah thisen pek huaihawtin, Aizawl Civil Hospital tan thisen unit 50 an pe a, petute mipa 34 leh hmeichhia 16 an ni. Durtlang HSS NSS pawhin Synod Hospital blood bank-ah thisen unit 15 an pe a, petute mipa pariat leh hmeichhia pasarih an ni.

Hmanrua sem
Krishi Vigyan Kendra, Mamit district, Lengpui chuan nimin khan Dárlâk khuaa Agriculture inspection bungalow-ah ICAR North Eastern Hills Programme bultumin loneitute hnenah buh vuakna (paddy thresher), leilet thlûr siamna (wheel hoe) leh thlasik thlai chi hrang hrang an sem.

Tanpuina hlân
Mizorama National Cadet Corps (NCC) chuan November 8, Thawhṭanni khan Muanna Venga Thutak Nunpuitute Team (TNT) hnenah ṭanpuina Rs. 67,000, buhfai ip ruk leh thawmhnaw eng emaw zat an pe. NCC cadet-te hi Hrangbana College leh Pachhunga University College naupang 74-te'n an hmanpui a ni.

Minister-in tlawh
Minister of state TJ Lalnuntluanga chuan nimin zing khan a bial chhunga Zokhawthar a tlawh a, khawtlang hruaitute nen inkawmin, mamawh leh harsatna an thlente a ṭul anga bawhzui sak a tum thu a sawi. Minister hian khawtlang hruaitute hnenah Rs 1,00,000 leh tuizém lian pahnih a pe.

Chhang ur zirtir
Siaha SIRD conference hall-ah nimin khan Mizoram Youth Commission, Medhavi Foundation leh Siaha District Skill Core Committee ten Covid-19 vanga hna thawk chhunzawm thei lo (returned migrant workers due to Covid-19)-te tan ni 10 awh tur chhang ur zirna thawh khatna an buatsaih ṭan.