COVID-19: Mizoram dinhmun ; Hripui vei 730 hmuh belh a ni
November 8, Thawhṭanni khan Mizoramah Covid-19 vei mi 730 hmuh chhuah a ni a, Thawhṭannia hmuh chhuah tam lamah India ramah pathumna a ni. Nimin khan hripui vei dam tawh mi 289 an chhuak a, hripui vangin mi pakhat a thi.
Covid-19 vei Thawhṭannia hmuh thar mi 730-te chu mipa 332 leh hmeichhia 398 an ni a; ZMC laboratory-a hmuh chhuah 128, TrueNAT hmanga hmuh 84, RAT hmanga hmuh 503 leh Fluorescent Immunoassay (FIA) hmanga hmuh 15 an ni.
IDSP record angin, Mizoramah Covid-19 vei 1,25,861 hmuh chhuah a ni tawh a, mipa 61,043 leh hmeichhia 64,818 an ni a, mipa aiin hmeichhia 3,775-in an tam zawk. Nimin tlai dar 5 thleng khan mi 1,19,990 (95.34%) chhuahtir an ni tawh a, mi 451 (0.36%) thi tawhin, enkawl mek mi 5,420 (4.30%) an awm.
Thawhṭannia swab sample endikah district pasarih chu Covid-19 positivity rate 10% chung lam a ni a; positivity rate san berna Serchhip district-ah 27.83% a tling. Positivity rate 10% chung lam awmna district dangte chu Champhai 20.06%, Hnahthial 19.67%, Aizawl 12.05%, Lunglei 11.10%, Mamit 10.82% leh Siaha 10.39% a ni.
Mizorama swab sample endik bikah RT-PCR hmanga endik zat percentage a tlahniam hret hret zel a, Rapid Antigen Test (RAT) hmanga endik zat a pung hret hret thung. November 8, 2021 thlenga swab sample endik tawh 13,51,615 aṭanga RT-PCR hmanga endik zat percentage chu 23.49 a ni a, RAT hmanga endik zat chu 70.54% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir tawh a ni.
Kum 2011 chhiarpui aṭanga chhûtin, Mizorama Covid-19 vei hmuh tawh 1,25,861 chu mi 1,000 zelah hripui vei mi 115 an awm ang a ni a; mi 1,00,000 zela Covid-19 vangin mi 41 an thi tawh ang a ni. Nimin khan tlai dar 5 thlengin hripui vei dam tawh mi 289 chhuahtir an ni a; Aizawl district-ah mi 195, Serchhip district-ah 39, Lunglei district-ah 33, Champhai district-ah 13, Hnahthial district-ah psarih leh Khawzawl district-ah mi pahnih an chhuak.
