Mamitah Veterinary Hospital hawng

Animal Husbandry & Veterinary (AH&Vety) minister Dr K Beichhua chuan nimin khan Mamitah District Veterinary Hospital leh Satellite Boar Semen Station a hawng.

Dr K Beichhua chuan, African Swine Fever dawnsawn danah Pathian leh ram hruaitute chunga innghat ngam turin mipui a sáwm a, "Kan ram hruaitute'n a theih chen chenah mipui tan ngaihtuahna an séng a, kan ramin nasa taka ASF a tuar hi a pawi hle a ni," a ti a, vawk chánte chu beidawng loa bul ṭan thar leh turin a chah.

Mamit district chu ramri depa awm a nih avangin buaina tawh palh thulhah mahni kea ding thei tura taimak leh tumruh taka hna thawh a ṭul thu sawiin K Beichhua chuan, "Mihring leh ran hriselna hi thil inzawm tlat a nih avangin ngaih pawimawh ve ve a ṭul. Ram páwn aṭanga ran natna lo lut tur kan do theih nan ran lak luh khap ṭhin a ni a, sorkar thuawih loa ran lo la lut an awm ṭhin hi a pawi hle a ni," a ti.

District Veterinary Hospital hi NABARD Rural Infrastructure Fund, Mizoram sorkar leh RIDF Project aṭanga sak niin, a sak nan cheng cheng nuai 175.05 sèn a ni a, September 30, 2019-ah sak ṭan niin, May 31, 2020-ah sak zawh a ni. Satellite Boar Semen Station chu National Livestock Mission hnuaiah cheng nuai 85 hmanga sak a ni a, March 20, 2020-ah sak ṭan niin, October 12, 2021 khan sak zawh a ni.

Hawnna inkhawmah hian AH&Vety and Sericulture Board vice chairman C Lalmuanpuia, MLA pawh a tel a ni.