HPC(D) mite chhawmdawlna hlân Sinlung Hills Council tihfel a la ni lo

Hmar Peoples' Convention (D) mi leh sa, Mizoram sorkara inpete chu nimin khan Police Headquarters, Khatlaah Home minister R Lalzirliana'n chhawmdawlna sum a hlan. Hetih lai hian, HPC(D) leh Mizoram sorkar inremna zinga a mi, Sinlung Hills Development Council (SHDC) ṭhiah a, thuneihna sang zawk Sinlung Hills Council (SHC) din tur chu tihfel a la ni lo.

Home Minister chuan, HPC(D) mi leh sa nunphung pangngaia nung tura kîrte chu Mizoram sorkarin a ngaih pawimawh thu a sawi a, "Sorkarin a intiamna chhawmdawlna sum pek chu a hlen chhuak a ni. Hnam khat vek kan ni tih hre reng a, Mizorama remna leh muanna a awm zel theih nan ṭhahnemngai taka sorkar nena ṭanrual a pawimawh," a ti.

HPC(D) mi leh sa nunphung pangngaia kirte'n chhawmdawlna an dawn Rs. 3,00,000 chu chhungte tuamhlawmna atana hman tham a nih thu sawiin R Lalzirliana chuan, "In tlakral mai mai a hlauhawm. Zoramah hian hlim leh lawm taka dam chhung hun in hman theihna atan rinawmna leh taimakna nen in pawisa dawnte hmang ang che u," a ti a; Mizoram Police chuan an tui zawng training dan tur an ngaihtuahsak tur thu a sawi.

Home Minister sawi danin, Mizoram sorkar leh HPC(D) inremna thuthlungin a ken tel pakhat, Sinlung Hills Development Council ṭhiata thuneihna sang zawk nei Sinlung Hills Council (SHC) din chungchang chu June 27, 2018-a Assembly Session-a rêl a ni dawn.

SHDC term chu May 31, 2018 khan a tàwp a, a thlaktu tur SHC din a la ni lo. Inremna ang chuan, SHC-ah chief executive member (CEM) pakhat, chairman pakhat, deputy chairman pakhat, executive member pali leh member pasarih awm tur a ni a; SHC inthlan hmaa sorkar lailawka hotu tur ruat atana an duhte chu HPC(D) aiawh lamin Mizoram sorkarah an thehlut tawh nia thu dawn a ni.

Inremna ang chuan, SHC headquarters-ah Secretariat din a ni a, Chief Minister-in SHC CEM ráwn chunga a ruat Secretary-in Secretariat a ho ang.

Mizoram sorkar leh HPC(D)-te hian April 2, 2018 khan State Guest House-ah inremna an ziak a, April 13, 2018 khan HPC(D)-te chuan CTI, Sesawngah an ralthuamte Mizoram sorkarah an tung. Ralthuam tun a nih ṭum hian an silai tun hlutna hû, cheng nuai 7.14 bakah, HPC(D) mi 114 hnenah Rs. 20,000 ṭheuh hlan a ni.

Nimina Home Minister-in HPC(D) mite hnena chhawmdawlna a hlan hi Rs. 2,80,000 a ni a, Rs. 2,50,000 chu cheque-a pek niin, Rs. 30,000 chu pawisa faia pek a ni thung.

Chhawmdawlna hlan inkhawmah hian HPC(D) mi eng emaw zat an tel a, a tel thei lote chu an chhungte'n an dawnsak.