Pathian ṭih mi Mizoramin a mamawh - ZPM Chairman

Zoram Peoples' Movement (ZPM) chairman Lalliansawta chuan, Citizenship (Amendment) Bill, 2016 chungchanga Mizoram sorkar hmalak dan chu mak a tih thu a sawi a; Mizoramin Pathian leh kohhran thu ngai pawimawh mi a mamawh thu a sawi bawk.

Nimina ZPM Steering Committee hruaitute

ṭhukhawm chuan an kal zel dan tur leh hmalakna hrang hrang an thlir a; meeting kaihruaitu Lalliansawta chuan, Citizenship (Amendment) Bill, 2016 chungchanga Mizoram sorkar hmalak dan mak a tih thu sawiin, "Tute nawr kal chawp nih an hreh chuan a tir aṭanga hma lak nghal theih a ni a, NGO leh party dangte an mangan hma hian Mizoram sorkar hi che ṭhin se," a ti.

ZPM Steering Committee Chairman chuan, ZPM hruaitute chu Pathian ṭanpui tlaka awm turin a chah a, "Pathian kan hriat dan leh kan ngaihdan te, a thisena a din kohhran kan ngaihdan angin kan nung ṭhin a, kohhran ho thu leh hlate hi kan ngaih pawimawh a ngai," a ti a; Pathian ṭih mi leh kohhran thu leh hla ngai pawimawh mi Mizoramin a mamawh tak zet thu a sawi.

Lalliansawta chuan, Mizoram hmun hrang hrangah ZPM boruak a kâng chak hle tih sawiin, "Kut hnathawkte hian beiseina sang tak an nei. Kan ram hian hmasawnna rahbi thar rap turin a inbuatsaih mup mup a. Kalphung thar hmanga sorkar siam turin ṭhahnemngai takin mahni awmhmunah i thawk ṭheuh ang u," a ti.