Mizorama lui lianten kâm lam pan

Tun hnaia ruahsûr nasa vanga Mizoram hmun hrang hranga tui­lian chuan kâm lam a pan a, tuilianin in a chîm vanga inthiar chhuak zingah an ina inthiar lut leh tawh pawh an awm.

Sairang YMA hruai­tute hnen aṭanga thu dawn danin, Sairangah chuan he thu ziah lai hian tuilianin in a chîm tawh lo a; nimin khan khawtlang mipuiin tui­lianin in a chimte an tifai a, chhungkaw ṭhenkhat chuan nimin vek khan an inah bungrua an thiar lut nghal. Sairangah tuilian vangin chhungkaw 12 an inthiar chhuak a ni.

Khawtlangtuipui lianin Thawhlehni khan Tlabung leh a chhehvelah chenna in 200 vel a chîm a, tuilian hi nimin lam khan tlemin ziaawm deuh mah se, in tam tak a la chim a ni.

Nimina sorkar thu­chhuah tarlan danin, Khawthlangtuipui lian hian Tlabungah in eng emaw zat a chim a, chhungkaw 173 chu hmun himah an inthiar chhuak hman a; Serhuan, Tipperaghat, Bindasora, Diblibagh leh khaw dang ṭhenkhatah chhungkaw eng emaw zat an inthiar chhuak bawk.

Tlabung SDO(C) V Lalmuanpuii kaihhruai Disaster Management Committee-in chhawm­dawl hna an thawk a, Tlabung SDPO K Beih­motaosa chu incident commander a ni.

Serhuanah silpauline 20 leh buhfai ip 20 an thawn tawh a, BSF-nen ṭangkawpin tui thianghlim in tur an sem mek bawk. Mipuite hmun him zawka hruai nan leh mamawh hrang hrang sem chhuah nan Forest department leh Police lawng (boat)-te hman a ni.

Tipperaghat, Bin­dasora, Tablabagh, Silgur, Diblibagh khua-ahte pawh silpauline, tui thianghlim leh buhfai a ṭul huna sem turin ruahman a ni tawh.

Lunglei DC aṭang­in silpauline, diesel, petrol leh mamawh dang eng emaw zat Tlabungah thawn a ni tawh bawk.

Langkaih lui leh Baw­rai lui lianin Zawlnuam Vengpui leh Bawrai venga in leh hmun eng emaw zat a chîm pawh tunah chuan a chîm tawh lo nia thu dawn a ni.