KHAWTHLIR
Blood Donor Day
Vawiin June 14 hi World Blood Donor Day a ni a, Aizawl leh district headquarters-ahte hman a ni ang. Aizawlah chuan Mizoram State AIDS Control Society leh Association for Voluntary Blood Donation huaihawtin Lal Thanhawla Auditorium-ah hman a ni dawn a, Health minister Lal Thanzara khuallian niin, Mizoram Youth Commission chairman Joseph Lalhimpuia, MLA khualzahawm a ni ang.
De-addiction centre chungchang sawiho
Mizoram Social Defence & Rehabilitation Board chuan nimin khan Secretariat conference hall-ah 'Technical Meeting on Accreditation of De-Addiction Centres in Mizoram' an buatsaih a, ruihhlo ngaite enkawlna kalpui dan an sawiho. Social Welfare secretary K Vanlalráwni chuan, ruihhlo ngaite enkawlna tur centre changtlung tak din Chief Minister-in a ngaih pawimawh thu sawiin, "A rang lama hmalak chhunzawm zel a ngai," a ti.
Damdawi-in pawm
Mizoram sorkar chuan City Hospital, Mission Veng; LRM Hospital, Ramhlun Venglai; Redeem Hospital, College Veng leh John Williams Hospital, Lunglei-te chu sorkar hnathawkte'n medical re-imbursement an tih theihna atan a pawm. Hemi chungchangah hian sorkar chuan nimin khan hriattirna a tichhuak a ni.
Chhiatna hmun tlawh
Tun hnai ruahsûr vanga Serchhip khaw chhung leh a chhehvela chhiatna thlenna hmunte chu nimin khan Serchhip District Disaster Management Authority member-te'n an tlawh kual a, khawtlang hruaitute a ṭul anga hmalak dan tur an sawipui a ni.
Tanpuina pe
Republic Veng Branch YMA chuan nimin khan YMA Day pualin Ṭawngṭai Bethel Camping Centre, Chawnpuiah buhfai ip 20, dal ip riat, alu ip nga, tél (packet) báwm sarih, chi ip khat leh purun sen ip khat an pe.