MURA member 16-in chaw an la nghei
Mizoram Underground Returnees Association (MURA) member 16-te chuan, Congress party (MPCC) nena an inremna tihhlawhtlin phûta June 6, 2018 aṭanga an pisaa chaw an nghei chu nimin thleng khan an la chhunzawm.
MURA hian May 28, 2018 khan Mizoram sorkar hnenah ultimatum pein, MPCC nena an inremna tihhlawhtlin a nih loh chuan thih thlenga chaw nghei an tum thu an ziak a; chumi bawhzuina atan chuan June 6, 2018 aṭangin chaw an ngei a ni.
Hetih lai hian, June 6 khan political secretary to chief minister KVL Siamkima chuan, MURA hnenah lehkha thawnin, MURA member-te leh an chhungte tan sorkarin hamṭhatna a pek tawhte a tarlang.
KVL Siamkima tarlan danin, MURA member leh an chhungte hi Mizoram sorkarin SSA zirtirtuah mi pakhat, LDC-ah mi pakhat, Mizoram Home Guard-ah mi pasarih thun an ni tawh a, PHE leh Rural Development-ah contract-in min eng emaw zat dah an ni tawh. KVI Board member-ah mi pali leh LAD Housing Loan member-ah mi pahnih dah an ni a, BPL in sakna Rs. 1,50,000 chu Kolasib-ah mi pariat pek a ni.
MURA member-te hnenah rangva bundle 160, in leh lo nei lo mi 60 hnenah LSC leh two wheeler taxi, maxicab permit leh taxi permit eng emaw zat pek a ni bawk.
KVL Siamkima chuan, MURA hnena lehkha a thawnah hian chaw nghei ṭhulh tura ngenna a ziak tel a, "May 31, 2018-a demand sawi thar leh hi ngun taka ngaihtuah a ni a, demand zingah 'In sak ṭanpuina nuai 20 ṭheuh sorkarin min pe rawh se' tih leh 'Inremna anga 4th. grade aṭanga LDC thleng MRHG telin MURA tu leh fate tan post 200 sorkarin min pe rawh se' tih hi sorkar kalphung pangngaiah tihhlawhtlin theih niin a lang lo a, inhriatthiamna kan rawn ngen e," a ti.
Hetih lai hian, MURA hian June 7, 2018-a thuchhuah siamin, KVL Siamkima'n MURA tana sorkar thil tihhlawhtlin anga a tarlante chu belhchian dâwl lo a nih thu an tarlang thung.
MURA-in an thuchhuaha an tarlante
• SSA teacher, Kolasib, Biakveli tih hi, Biakvuli a nih hmel, MURA hminga dah a nih kan hre lo. Lalhunmawii (Mahuni) Forest LDC, Lawngtlaia mi hi Congress sorkar din hma, C Ramhluna'n PCCF a nih laia a lak a ni.
• MRHG-ah mi pasarih tih hi kum hnih kal ta khan mi pahnih MURA Gen. Hqrs. recommend-nain lak an ni a, panga dang hi MURA-in a hre lo.
• PHE leh RD Department a-
ṭanga contract hna pek hi MURA chuan work order a hmu lo.
• BPL in sakna Rs. 1,50,000 Kolasib mi pariat hnena pek hi MURA Gen. Hqrs. chuan report a dawng lo a, a hriatpui lo.
• MURA member in leh lo nei lote tan LSC 60 pek tih hi plot 45 niin, plot 3 dang hi biak-in, anganwadi leh YMA hmun a nih avangin a vaiin plot 48 a ni a, MURA-te kutah LSC pek a ni lo.
• Permit hrang hrangte hi MURA-te'n dilna kan thehlut ngei a, heng zingah hian two wheeler taxi panga chiah pek kan ni.