Mizoram Home Guards & Civil Defence-ah Director General post siam vat turin sorkar phût

Mizoram Police Service Association (MPSA) leh Mizoram Police Subordinate Officers' Association (MPSOA)-te chuan, Mizoram Home Guards & Civil Defence (HGCD)-ah Director General (DG) post siam thuai turin Mizoram sorkar an phût.

An thil phût nawr nan tun thla, June 16-20 chhung badge dum bel an tum bakah, pen/tool down strike leh mass casual leave thlenga lungawi lohna lantir an tum thu an puang.

MPSA leh MPSOA hruaitute chuan nimin khan Aizawl Press Club-ah thuthar thehdarhtute an kâwm a; Mizoram Home Guard Service Association leh Ex-Servicemen Leaque-te chuan HGCD leh hotu atan DG dah chungchangah a ṭobul an hre lo nia sawiin, vanduaithlak an tih thu an sawi a, "DG post siam avang hian Ex-Service-te post a tihêk lo a, an duty post chelh mek luahlan emaw a awm lo," an ti.

MPSA leh MPSOA tarlan danin, Ministry of Home Affairs (MHA)-a Disaster Management Division-in August 5, 2014-ah state leh union territory zawng zawng Chief Secretary hnenah Plan Scheme for Maintaining Civil Defence in Disaster Reduction (2014-2017) tihhlawhtlin nan cheng vbc. 290.89 a dah a nih thu a thawn a; India rama district tinah Civil Defence din turin a ti. India rama district zingah most vulnerable district 140 thlan chhuah a ni a, chu'ng zingah chuan Mizorama district pariatte a telh vek a ni.

MHA chuan November 16, 2014-ah Mizoram Chief Secretary lehkha a thawn nawn leh a, Mizoramah Civil Defence din a la a nih loh avangin din turin a rawn hriattir. Civil Defence chu Civil Defence Act, 1968 leh Compendium of Instruction of Civil Defence, 2011 tlawhchhana din tura tih a ni. Mizoram district pariata Civil Defence dinna tura Mizoram tana sum dah chu nuai 1161.23 a ni a, November 12, 2014-ah nuai 154.16 a pe nghal.

Mizoram sorkar pawhin Civil Defence din turin hma a la zui a, Home department aṭangin state dangte tih dan zir chiang turin officer-te a tir a ni. State tin deuh thawah Compendium of Instruction of Civil Defence, 2011-in a sawi angin, Home Guard leh Civil Defence chu department pakhatah an chhûn fin niin an sawi.

MPSA leh MPSOA hruaitute chuan, Compendium of Instruction of Civil Defence, 2011-in a phût angin, HGCD-a DG post chu IGP emaw, state sorkara secretary rank chin dah tura tih niin an sawi a, "State lianah chuan DGP rank-in HGCD hi an ho a, state tê deuhah chuan IGP rank-in an ho. Zir chian hnuah Mizoram sorkar pawhin Mizoram Home Guards (MRHG)-a DG post chu Dt. 27.8.2014 khan IGP/Secretary rank angin MPS senior most post atan a siam a, MRHG chu Home Guard & Civil Defence-ah tihlen a ni," an ti.

Mizoram sorkarin MRHG-a DG post a siam chu Mizoram Home Guard Service Association-in High Court-a an khin hnua High Court-in January 22, 2018-a judgment order a tihchhuahah, Mizoram Home Guard Act, 1985 tihdanglam a nih loh chuan DG post siam theih a ni lo a tih avangin, Court thutlukna angin dan siamrem (amend) mek a nih thu an sawi.

MPSA leh MPSOA hruaitute chuan, HGCD-ah DG post siam thuai turin Mizoram sorkar an phût a, sorkar kar nan badge dum bel phawt an tum thu an puang a ni.