Chhiatrupna a thlena hmalak dan tur sawiho

Lunglei District Disaster Management Authority (LDDMA) chu June 12, Thawhlehni khan Lunglei DC Dr Ankita Charavarty hoin a pisaah an ṭhukhawm a, chhiatrupna a thlena hmalak dan tur an sawiho.

Dr Ankita Chakra­varty chuan, June 4, 2018 zana Lunglawna leimin nasa tak vanga chhiatna rapthlak thleng chu pawi a tih thu leh chhiat tâwk chhungkuate a tawrhpui thu a sawi a, "Chhiatna thlen thu hriat a nih veleh department hrang hrang, tlawmngai pawl te, Lunglei District Adventure Club, 1st. Assam Rifles leh khawtlang hruaitute'n chhanchhuah hna a rang thei ang berin an thawk nghal a ni," a ti.

Tun hnaiah ruahsûr leh thli tleh avangin an district chhung hmun hrang hrangah harsatna a thlen thu sawiin Lunglei DC chuan, "In chhia, kawngpui min, leiminin kawngpui a hnawhte leh lui lianin chenna hmunhma a chîm mekte a awm nual a ni," a ti a; chhiatrupna lo thlen thulha chêt lâk dan tur mumal taka an ruahman fel a, thawhhona tha tak nen kan kalpui a ṭul thu a sawi.

Meeting-ah hian chhiatrupna hmachhawn dan tur leh mi mangang, ṭanpui ngaite leh chhanchhuah ngaite puih dan tur sawiho a ni a; department hotu te, tlawmngai pawl aiawh te, BSF, Assam Rifles, Lunglei District Adventure Club hruaitute an tel a ni.