Zirtirtu indaihlohna phuhruk turin hma lak mek a ni - H Rohluna

School Education minister H Rohluna chuan, zirtirtu indaihlohna a ziaawm theihna atan Mizoram sorkarin theih­tawp chhuaha hma a lak mek thu a sawi.

Kawlkulh MZP-te'n an khaw hall-a HSLC leh HSSLC pass tharte chawimawina hun nimina an buatsaih a hmanpuinaah thu sawiin Education Minister chuan, "Zirna hi a bul ṭhut a fuh loh chuan a lerah a fuh thei tak tak lo va, hei vang hian sorkar pawhin elementary lamah hma a la nasa a, zirtirtu indaihlohna pawh a ziaawm theih nan nasa takin sorkarin hma a la mek a ni," a ti.

H Rohluna chuan kumin HSLC leh HSSLC result chhuakah hmasawnna chi hrang hrang hmuh tur a awm nia sawiin, "Kum dang zawng aiin pass percentage a san bakah kum dangah chuan third division-a pass an tam ber ṭhin laiin kuminah chuan second division-a passed an tam ber a, hei hian zirlaiten quality improvement nasa tak a awm tih a tarlang," a ti a, khawpui leh thingtlang lam zirlaite result pawh a inhrutrual chhoh ṭan thu a sawi.