GST chungchang sawiho a ni

Nimin khan video conferen­cing hmangin 40th Goods and Services Tax (GST) Council meeting neih a ni a, Covid-19 hripuiin India rama chhiah (GST) dinhmun a nghawng dan an sawiho. Mizoram aṭangin Taxation minister Lalcham­liana, Taxation secretary Vanlal Chhuanga, state tax commissioner Kailiana Ralte leh Taxation officer dangte an tel.

Meeting-a tarlan danin, inkhàrkhip vanga India ramah sumdawnna hrang hrang mumal taka kalpui theih a nih loh avangin thla tina chhiah pek hunbi leh late fee chungchangah hriatthiamna zau tak nen a bik taka ruahmanna siam a ni. Hei vang hian kumin April leh May thla chhung khan chhiah (GST) tlingkhawm a tlahniam.

Tun dinhmunah sorkar kum kal lai 2020-21 chhunga GST bei­sei dan tur hriatthiam a har a; chu­tihrualin, inkhàrkhip hlih a nih a, sumdawnna mumal taka kalpui theih a nih hunah chhiah hmuh zat chu a ziaawm tura beisei a ni.

Sawihonaah hian GST Council meeting vawi 39-nain a rèl tawh angin, GST Act hnuaia notification, order leh circular hrang hrang tihchhuahte nem­ngheh a ni a; central sorkar leh state hrang hrang sorkarte'n GST Act kalpuinaa siamṭhat ngai a awm leh awm lohte thlirhoin, a ṭul anga hmalak dan turte an rél bawk.

GST Council hi The Constitution (101st Amendment) Act, 2016 hnuaia Article 279A tlawhchhana din niin, constitutional body a ni a; Union Finance Mi­nister kaihhruaina hnuaiah state hrang hrang finance minister emaw taxation minister emawte chu member an ni. Central leh state inkarah leh state leh state inkarah palai hna a thawk a, rual­khai taka hna thawhho dan tur an ngaihtuah ṭhin a ni.