Covid-19 vanga thi mi 42 hnenah Ràlna Rs 21,00,000 pek a ni tawh

State Disaster Relief Fund (SDRF) aṭangin November 9, Thawhlehni thleng khan Covid-19 vanga thite ràlna mi 42 hnenah pek a ni tawh a, mitthi chhungte aṭangin dilna 273 a lut tawh. DMR department chuan September 28, 2021 khan Covid-19 vanga thite ràlna (ex-gratia) sorkar aṭangin Rs. 50,000 pek dan tur inkaihhruaina a tichhuak a ni.

Kumin November 9, Thawhlehni zing dar 7 thleng khan Mizoramah Covid-19 vangin mi 450 an thi tawh a, Khawzawl district-ah hripui thihpui an la awm lo thung.

Covid-19 vanga thi zinga 273 chhungte'n an awmna district-ah ràlna dilna an thehlut tawh a, ràlna chu mi 42 hnenah pek tawh niin, Rs. 21,00,000 pek tawh a ni. Dilna lut tawh 273 zinga 231 chu document ennawn/endik ngai leh sum awm remchan loh avangin pek an la ni lo.

DMR department-in September 28, 2021-a inkaihhruaina a tihchhuahah chuan, Covid-19 vanga thi chhungte hnenah ràlna pek tur chu Supreme Court-in June 30, 2021-a order a chhuah leh National Disaster Management Authority (NDMA)-in September 11, 2021-a lehkha a tihchhuah bawhzuina a nih thu te, District Disaster Management Authority (DDMA) / DC hnenah dilna hi thehluh tur a nih thu te, ralna chu state sorkarin State Disaster Relief Fund (SDRF) aṭanga a pek tur a nih thute tarlan a ni.

Covid-19 vanga thi tamna ber Aizawl district-ah November 9, 2021 zing thleng khan mi 312 an thi tawh a, chung zing aṭang chuan ràlna dilna 189 lut tawh mah se, pek an la awm lo. Aizawl DC pisa aṭanga Vanglaini thu dawn danin, Aizawl DDMA-ah sum (fund) balance a awm tam loh avang leh ràlna pek ngai a tam avangin Aizawl district-a dilna lutte chu pek an la ni lo a, SDRF aṭanga sum hmuh belh hun an nghâk mek.

Lunglei district-ah November 9 zing thlengin hripui vanga thi 28 an awm tawh a, chu'ng zinga 12 chu ràlna pek an ni tawh. Siaha district-ah mi 15 an thi tawh a, chu'ng zinga 10 aṭangin dilna a lut tawh a, pek erawh an la awm lo.

Champhai district-ah chuan mi 11 an thi tawh a, dilna paruk lut tawhin, mi panga hnenah ràlna pek a ni tawh.

Kolasib district-ah mi 30 an thi tawh a, dilna 21 lut tawh zinga 12 chu pek tawh a ni. Serchhip district-ah mi 14 thi tawhin, dilna 11 a lut tawh a, paruk pek tawh a ni a, pakhat hnâwl niin, pali chu pek tura buaipui mek a ni.

Lawngtlai district-ah chuan mi 23 thi zinga 15 aṭangin dilna a lut tawh a, document kim lo leh ennawn ngai a awm nual avangin pek an la awm lo. Mamit district-ah mi 12 an thi tawh a, dilna paruk lut tawhin, mi pali pek a ni tawh a, a dang pahnih chu pek turin an buaipui mek.

Hnahthial district-ah hripui vangin mi pathum an thi tawh a, dilna pakhat lut tawhin pek a ni tawh. Saitual district-a mi pahnih thite chu ràlna pek ve ve an ni tawh bawk.