Thla ruk chhung hlawh la tawh lo ; TPFA-te'n hna thawh loh an tum

Tiger Protection Force Association (TPFA), Dampa Tiger Reserve chuan, sorkarin thla ruk chhung hlawh a pe tawh lo tih sawiin, November 20, 2021 ral hma ngeia hlawh pek an nih loh chuan hna thawh tawh rih loh an tum tih an puang.

Dampa Tiger Reserve hnuaia thawk TPFA chuan thuchhuah siamin, "November 20, 2021 kan hun tiam ral hma ngei hian sorkarin kan thla ruk hlawh hi a remchan dan leh a ṭul dan anga min ngaihtuahsak thei lo a nih chuan Tiger Protection Force staff mi 152-te chu duty-in kan chhuak thei tawh dawn lo a ni tih min hriatsak turin thu neitute kan ngen e," an ti.

Thla ruk chhung an thawh hlawh an la thei tawh lo tih sawiin TPFA chuan, "Thla ruk lai hlawh kan lâk theih tawh loh avangin DTR staff-te'n duty-a chhuah hi harsa kan ti tawh hle a ni," an ti a; hun eng emaw chen sakei thlalak an neih loh hnuin February 2021 khan hmuh a ni tih sawiin, sakei an hmuh hnuah an hlawh pawh pangngai (regular) taka an lak theih an inbeisei laia tun thlenga hlawh an la thei lo chu hriatthiam har an tih thu an tarlang.

TPFA chuan, DTR hnuaia TPF staff-te chu chhungkua/nupui fanau châwm deuh vek an nih thu sawiin, "Dawra kan batnate pawhin bat an phal lo ṭan. Regular takin wildlife protection duty-in kan chhuah ve reng a ngai bawk nen, sorkar hnuaia thawk kan nih miau avangin kawng dang hmangin sum kan zawng / ngaihtuah hman bawk si lo a, kan mangang tawh tak zet a ni," an ti.

Dampa Tiger Reserve-ah hian tiger protection force (TPF)-te hian a hmain thla ruk chhung, kum 2020 tawp lam leh kumin 2021 kum tir lamah hlawh an lâk theih loh avangin lungawi lohna an lantir tawh a; tunah hian May - October, 2021 chhunga an hlawh an la lâk loh avangin lungawi lohna lantir turin ruahmanna an siam leh ta a ni.

A hmaa thla ruk chhung hlawh an lak loh vanga hna thawk loa lungawi lohna an lantir hnu lawkah Dampa Tiger Reserve Field Director chuan April 7, 2021 khan TPF-te chu an hna aṭanga bàn an nih thu leh TPF tur a thara lak a nih tur thu a puang a; mahse, sorkar hotute nen an inbiakrem hnuah an hna ngai an thawk zui leh a ni.