A intiam ang ngeia RD Block pe turin Tlabung mipuiin RD Minister an ngen

Tlabung khawtlang mipui chuan an khaw kum 150 tlin lawmna hmanpuitu Rural Development (RD) minister Lalruatkima chu a intiam ang ngeia RD Block pe turin hmaichhanah an ngen.

Lalruatkima hian November 8 leh 9, 2021 khan Tlabung kum 150 tlin lawmna a hmanpui a, November 9-a an hun hmang zo a haw lam lo hmu turin mipui an pung khawm a, a intiam ang ngeia RD Block pe turin an ngen. Tlabung aṭanga thudawn danin, RD Minister hian Tlabung mipuite chu RD Block pek a tiam a ni.

Tlabung MZP hruaitute aṭanga Vanglaini thu dawn danin, Lalruatkima hian Lok Sabha MP inthlan leh village council inthlan campaign laiin Tlabung chu RD Block pek a tiam a; kumina khaw fai inelna lawmman semnaa kal Tlabung VC-te hnenah pawh kum 150 tlin lawmna atana RD Block pek an nih tur thu a lo hrilh bawk.

RD Block duha Tlabung mipui kal khawmte chuan inthlan campaign auhla atan ringawta RD Block pek intiam chu an lungawi loh thu RD Minister an hrilh a ni.

Lalruatkima chuan, Tlabung RD Block din turin Covid-19 avangin hmalak chak theih a nih loh thu a sawi a, "Lehkhain DPR leh Finance a kaltlang vek tawh a, Cabinet meeting-in a la ngaihtuah lo chauh a ni," a ti.