New Market-ah Mask Campaign neih a ni

Sorkar hmalaknain nimin khan Aizawl New Market-ah Mask Campaign neih a ni a, hmai tuamna (mask) eng emaw zat sem a ni.

Mask Campaign hi New Market office-ah hawnna inkhawm neih a ni a, AMC Ward-IX councillor B Lalawmpuii'n a hmanpui. B Lalawmpuii chuan, Covid-19 laka him nan mask vuah a pawimawh ber nia sawiin, New Market-a thil zuar leh thil leitute chu uluk taka hmai tuam turin a ngen a, "Covid-19 laka kan him theih nan mask vuah hi kan tihmâkmawh a ni a, kan himna tura pawimawh ber a ni," a ti.

Aizawl City Local Council Association president H Malsawma pawhin thu sawiin, Dawrpui huam chhunga hripui a darh ṭhin chu New Market aṭanga chhuak ṭhin nia a hriat thu leh hripui laka inven nan hmai tuam ṭhat leh kut sil chu pawimawh hmasa a nih thu a sawi.

New Market-a assistant market­ting inspector VL Sawma chuan, Mizorama ni tina mipui pun khawm tamna ber New Market-ah sorkar hmalaknain Mask Campaign neih a nih thu a sawi a, "Mask Campaign laia thu awih lo, warning pek tawh hnua dan bawhchhe lui zelte chu an seat tihtawpsak thlengin hmalak a ni ang," a ti.

Mask Campaign-a sem turin councillor B Lalawmpuii chuan hmai tuamna 2,500 a thawh a, Aizawl City Local Council Association-in pawisa an hlan bawk.

New Market-ah hian hripui lèn hmain ni tina eizawnga chhuak mi 2,160 an awm ṭhin a, building ṭhiah a nih avangin mi 1,193 chu Bawngkawn leh Khatla lamah sawn a ni.