'Zorama hian a unaute sum mai ni lo mipui sum a kawl tel em?' - ZPM Thalai

ZPM Ṭhalai chuan thuchhuah siamin, Special Court (Prevention of Corruption Act)-in chief minister Zoramthanga thiam a chantir tâk chu a unaute sum chauh ni lo mipui sum a kawl tel leh tel loh an zawt.

ZPM ṭhalaite chuan, CM Zoramthanga chu a sum hlawh leh a thil neih inmil lo leh sorkar bungrua hmang dik loa puh a ni tih tarlangin, "Special Court-in Pu Zoramthanga thiam a chantîrna hian kan CM hi mi dang sum leh pai tur kawl chungchânga mi chung chuang a ni tih a târlang chiang hle. A unaute pawisa chauh ni lo, mipui sum pawh hi a lo kawl tel reng em, tih hi zawhna lian tak niin kan hria a, ngaihtuahna a tithui hle a ni," an ti.

Eirûkna leh hlemhlêtna laka fihlim lo ram hruaitu chu ram hmasawnna dâltu a ni tih hre thar tura mipui chahin ZPM Ṭhalai chuan, "Ram hruaitute hian an thutiam an ti hlawhtling em, tihte hi chhût nawn fo ila. Ram hruaitute hian ram leh mipui hmasawnna nge an ngaih pawimawh an mahni hlawkna, tihte hi chîk deuh deuh turin mipui kan sáwm a ni," an ti a; Mizoramin hmasawnna leh changkânna kawng a zawh theih nan ram hruaitu atan mi dik leh rinawm, thutiama ding nghet mi neih tum turin mipui an sáwm a ni.