Hripui vei dam tawhte fimkhur turin chah

Zoram Medical College Covid Task Force nodal officer Dr PC Lalramenga chuan nimin khan Covid-19 vei tawh dam lehte tana hriat tur a tichhuak a; Covid-19 veite chu an dam hnuah virus hnathawh avangin natna khirh tak neih theihna a sàn avangin hun rei tak chhung chu fimkhur taka an la inenkawl a ngaih thu a tarlang.

Dr PC Lalramenga chuan, inen­kawl uluk zual a ngaih hun chu zir chianna kal mek a nih avangin engtia rei nge ngai tih sawi chat theih a la nih loh thu sawiin, "Hripui veite an negative hnua dam fel hmak chu a tam zawk an nih laiin, mi eng emaw zat chuan a tira natna an neih lâwk loh natna dang khirh tak tak an vei thei tih zir chianna leh kan tawnhriat aṭangin kan hmu tawh," a ti a; natna benvawn leh khirh nei sate chu an inenkawl uluk a ngaih thu a sawi.

Covid-19 chu virus a nih avangin kawng hrang hrangin taksa a nghawng thei tih sawiin Dr PC Lalramenga chuan, "Khawvel hmun hrang hrang leh Mizorama Covid-19 vei negative tawhte aṭangin hei hi a takin kan hmu mek. Covid-19 hrikin a khawih nat ber chu chuap a ni a, heng bakah hian lung, tihrâwl, ruh chuktuah, thluak leh rilru lamte a khawih nasa zual a ni," a ti.

Dr PC Lalramenga tarlan ṭhenkhat
1) Negative tawhte chu taksa sâwizawi leh hna thawhnaah a chin tâwk an hriat a pawimawh a, hah leh thlan tla bawrh bawrh khawpa tih loh rih a pawimawh.
2) Ni danga taksa insâwizawi leh hna thawh dan chanve vel tala tihhniam a ngai a, ei leh in pawh insûm a ṭul. Zûk leh hmuam tih loh, thau leh mawm ei lohte a pawimawh a, thei leh thlai lam ei uar a ṭha.
3) Mihring chuap hi Covid-19 in a khawih nasat avangin negative tawhte pawh an inenkawl uluk a ngai a, chuap a khawih chhiat nasat hman chuan harsatna lian tak kan tâwk thei.
4) Covid-19 hrikin thisen záma thisen kal lai a tihkhang theih avang leh thisen kal tluang lai a dan chah theih avangin lung natna chi hrang hrang bakah, heart attack neih thutte a thlen thei.
5) Tihrâwl leh ruh chuktuah na ṭhém ṭhúm bakah, depression leh anxiety thlengin a thlen thei.
6) Hripui veite chu an negative hnuah pawh regular takin medical check-up an neih a pawimawh a, doctor-te'n an him nia an sawi hma chu inenkawl uluk hle tur.
7) Inentir turin specialist doctor kher ràwn a ngai lo a, doctor tu pawhin an enkawl thei. A ṭul dan azirin specialist doctor ráwn tura an hrilh a him em em a ni.