CCC-in conference agenda tur an tifel

YMA rorelna sang ber dawttu, Central Coordi­nation Committee ṭhut­khawm vawi 92-na chu nimin khan Chanmari YMA Hall-ah neih a ni a; kumina YMA General Conf-a rêl tur (agenda) an thlang.

YMA CCC ṭhutkhawm hi Central YMA president Vanlalruata'n a kaihruai a, palai 252 an tel. CYMA general secretary Prof. Lalnuntluanga'n CYMA hmalakna tlangpui sawiin, Covid-19 lêng avangin CCC ṭum nga neih theih a nih loh thu leh YMA Rorel Inkhawm pawh nikumah neih theih a nih loh thu a sawi.

CCC chuan, YMA General Conference vawi 73-na chu hripui léng avangin neihna tura ruat Bilkhawthlirah neih theih a nih dawn loh avangin, kumin chhung ngeiin CYMA thlen turin Aizawlah neih turin an rêl a, thil ṭulte bawhzui chu Central Executive Commi­ttee kutah an dah.

Ṭhutkhawmah hian YMA kumpuan atana rawtna pahnih, 'Ram leh hnam humhalh' leh 'Zirna uar' tihte chu General Conference-a buk turin an pawm a, agenda tur dangte an tifel bawk.