KHAWTHLIR

Thisen pe
ṬKP, Hnahthial Bazar Bial leh Hnahthial North Bial-te chuan nimin khan thisen pek an huaihawt a, Lunglei Civil Hospital tan thisen unit 67 an pe a, petute mipa 62 leh hmeichhia panga an ni. ṬKP, Nazareth Unit, Lawngtlai pawhin nimin khan an kohhran sunday school hall-ah thisen pek an huaihawt a, Lawngtlai District Hospital tan thisen unit 21 an pe a, petute mipa 18 leh hmeichhia pathum an ni.

E.Roll ennawn mek sawiho
Chief electoral officer P Jawahar kaihhruaiin nimin khan Secretariat conference hall-ah State SVEEP Core Committee chu an ṭhukhawm a; electoral roll ennawn mekah chak zawka hmalak dan tur te, media kaltlanga mipui zirtirna lama ṭan lak dan tur te, Online Electoral Literacy Club (ELC) hman ṭangkai lehzual dan turte an sawiho.

VDP-te dan zirtir
Armed Veng South VDP chuan tun hnai khan an veng community hall-ah an khawtlangin sual donaa dik taka hma an lak theih nan Legal Awarness an buatsaih a, advocate T Lalnunsiama'n VDP-te'n dan an hriat tur pawimawh hrang hrang a sawifiah. An hun hmanpuitu bialtu councillor Christina Roluahpuii Sailo chuan, sual chu do tur a nih rualin, dan ngaihtuah lék loa do erawh a fuh ber loh thu a sawi.

Sial vulh inzirtir
AH&Vety dept, KVK Siaha leh ICAR-National Research Centre on Mithun, Nagaland-te chuan nimin aṭang khan Tipa-B, Chapi, Chheihlu leh Laki khuaa sial (mithun) vulhtute tan training an buatsaih a, sial vulhtu mi 46 an tel.

Minister-in tlawh
Social Welfare minister Dr K Beichhua chuan nimin khan Kelsiha Tribal Research Institute leh Tribal Freedom Fighter Museum (Ropuiliani Museum) sak mek a tlawh. Beichhua chuan, Ministry of Tribal Affairs-in India ram zalenna vawi 75 champha lawmna puala an project thawh mekte hawn hman an duh angin, project pahnih hi hawn hman a nih a beisei thu a sawi.