COVID-19: Mizoram dinhmun Hripui vei 525 hmuh belh a ni

November 9, Thawh­lehni khan Mizoramah Covid-19 vei mi 525 hmuh chhuah a ni a, hmuh chhuah thar tam lamah India ram state leh union territory zingah pangana a ni. Nimin khan hripui vei dam tawh mi 342 chhuahtir an ni a, hripui vangin mi pathum an thi.

Covid-19 vei hmuh tharte chu mipa 206 leh hmeichhia 319 an ni a; ZMC laboratory-a hmuh chhuah 73, TrueNAT hmanga hmuh 48, RAT hmanga hmuh 393 leh Fluorescent Immunoassay (FIA) hmanga hmuh 11 an ni.

IDSP record angin, Mizoramah Covid-19 vei 1,26,386 hmuh chhuah a ni tawh a, mipa 61,249 leh hmeichhia 65,137 an ni a, mipa aiin hmeichhia 3,888-in an tam zawk.

Nimin tlai dar 5 thleng khan mi 1,20,493 (95.34%) chhuahtir an ni tawh a, mi 456 (0.36%) thi tawhin, enkawl mek mi 5,437 (4.30%) an awm. November 9, Thawhlehnia Covid-19 vei hmuh chhuah mi 525 zinga mi 318 chu symtom nei an ni a, symprom nei lo mi 205 awmin, mi pahnih erawh chu tarlan chian a ni lo.

Thawhlehnia swab sample endikah district panga chu Covid-19 positivity rate 10% chung lam a ni a; positivity rate san berna Serchhip district-ah 28.07% a tling. Positivity rate 10% chung lam awmna district dangte chu Champhai 27.71%, Hnahthial 21.97%, Lunglei 12.54% leh Aizawl 10.49% a ni.

Mizorama swab sample endik bikah RT-PCR hmanga endik zat percentage a tlahniam hret hret zel a, Rapid Antigen Test (RAT) hmanga endik zat a pung hret hret thung. November 9, 2021 thlenga swab sample endik tawh 13,56,526 aṭanga RT-PCR hmanga endik zat percentage chu 23.40 a ni a, RAT hmanga endik zat chu 70.60% a tling. Hetih lai hian, sorkar laipui chuan sample endik zawng zawng aṭanga 70% tal RT-PCR hmanga endik turin state leh union territory sorkarte a lo hriattir tawh a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,26,386 chu mi 1,000 zelah hripui vei mi 115 an awm ang a ni a; mi 1,00,000 zela Covid-19 vangin mi 41 an thi tawh ang a ni.
Nimin khan tlai dar 5 thlengin hripui vei dam tawh mi 342 chhuahtir an ni a; Aizawl district-ah mi 116, Lunglei district-ah 112, Khawzawl district-ah 35, Champhai district-ah 29, Lawngtlai district-ah 19, Serchhip district-ah 18 leh Mamit district-ah mi 13 an chhuak a ni.