Covid-19 vangin mi 456 an thi tawh

Mizoramah November 9, Thawhlehni tlai dar 5 aṭanga nimin tlai dar 5 thleng khan Covid-19 vangin mi panga an thi. Nimin tlai dar 5 thlengin Mizoramah Covid-19 vangin mi 456 an thi tawh.

November 9, Thawhlehni tlai dar 5:20 khan R Zothanmawia (47), Mission Veng chu hripui vangin State Referral Hospital-ah a thi a; Covid-19 vei a ni tih November 8 khan hmuh chhuah niin, SRH-ah dah luh nghal a ni a, a tuk tlaiah a thi nghal a ni. Vanlaltluanga (59), Lunglei pawh November 9 tlai dar 5:35 SRH-ah a thi a; hripui vei a ni tih November 2-ah hmuh chhuah niin, November 3 khan SRH-ah dah a ni. An pahnih hian natna dang nei tel an ni.

Nimin zing dar 7:30 khan Kapnguri (61), Ruantlang, Champhai chu hripui vangin Champhai DCHC-ah a thi a; Covid-19 vei a ni tih November 8-ah hmuh chhuah niin, natna dang nei tel a ni. Nimin zing dar 8:50 khan Lalṭhakimi (32), Tuivamit, Aizawl chu SRH-ah a thi bawk a, hripui vei a ni tih October 27 khan hmuh chhuan niin, October 30 aṭangin SRH-ah enkawl a ni a, natna dang a neih tarlan a ni lo.

Samuel Lalrinawma (40), Vaivakawn pawh nimin chawhnu dar 2:30 khan Covid-19 vangin SRH-ZMC-ah a thi. Amah hi damlo sa a ni a, damdawi-ina dah luh a nih hnuah a thih hma ní, November 9 khan Covid-19 positive a ni tih hmuh chhuah a ni.