Covid-19 leh All Mask Campaign sawiho

Health minister Dr R Lalthangliana hoin district tina bawrhsap, chief medical officer leh Information & Public Relations Officer (IPRO)-te chuan nimin khan video conferencing kaltlangin All Mask Campaign kalpui mek dan leh Covid-19 dinhmun an sawiho.

Dr R Lalthangliana chuan, "State Expert Team on COVID-19 Management-te'n kan dinhmun thlirin hmai tuamna vuah tura inzirtirna chu ngawrh lehzuala kalpui a la ṭul an ti a, hei vang hian All Mask Campaign hman mek pawh thla khat zet kan kalpui tawh hnuah November 15, 2021 thleng pawhsei a ni. Ngawrh lehzuala mask vuah a himzia kan inzirtir a ṭul dawn a ni," a ti.

Health Minister chuan, Covid-19 donaa hmalakna hrang hrang sorkarin a ruahman ṭhinah DC-te leh IPRO-te'n Health department hmalakna ṭha taka an thlàwp ṭhin thu a sawi a; Covid-19 vaccine pekah district hotute ṭhahnemngaihna avangin Mizoram chu India ramah a ti ṭha ber pawl a nih thu a sawi bawk.

District hrang hranga sorkar official-te tarlan danin, All Mask Campaign ngawrh taka an kalpui avang leh mipui pawhin fimkhur nachang an hriat zel avangin Covid-19 vei hmuh thar zat a tlahniam zel a; thingtlang lamah pawh nasa lehzuala beihpui thlak a ni a, a tlangpuiin hmalakna a hlawhtlingah an ngai a ni.

Covid-19 vaccine pekna chu district tinah tluang taka kalpui a nih thu tarlan a nih rualin, chhuanlam hrang hrang neia vaccine la duh lote rilru hneh erawh theihtawp an chhuah chungin a harsat thu an sawi a; Myanmar ráltlân lo mikhualtu district-te chuan ráltlânte chu vaccine pek vek tuma hma an lak mek thu an sawi bawk.