Sawivunga'n central service-a tlingte senso pek lêt a tum

Aizawl South-I bialtu MLA C Lal­sawivunga chuan nimin khan a biala HSLC pass tharte lawmpuina, Central Hall-a buatsaih a hmanpui a; a bial chhung aṭanga central service a inziak tlingte senso MLA fund 

aṭanga a pek lêt vek tur thu a sawi.

C Lalsawivunga chuan, "Aizawl South-I bial mipuite'n hei hi lo hria u la ka duh chu, a hmaa ka lo sawi tawh ang khan, ka bial chhung aṭanga central service, a enga pawh ni rawh se, chutianga tlingte reng reng chu bialtu MLA ka nihna angin MLA fund aṭangin an senso zawng zawng kan re-imburse leh vek ang," a ti.

YMA chu pawl thianghlim a ni a, kumpuan a neih mek pawh 'Zirna uar' a nih thu sawiin C Lal­sawivunga chuan, "Zo fate hmasawnna tur leh Zo nun mawi vawng nung zel tur hian kan inthlahthlam thiang lo. Kan ram leh hnam hi zirna leh thiamna, ruihhlo laka fihlim leh rinawmna, thawhrimna hmanga kan humhalh a ngai a ni," a ti a; Mizoram a boral lohna turin ṭhalai leh ṭhangtharte kutah thui tak a innghah thu a sawi.

Aizawl South-I MLA hian a bial chhung veng hrang hranga HSLC pass tharte hnenah an awmna veng YMA kaltlangin dictionary a pe a ni.