Ramri bulah hma la lo turin Home-in ramria DC-te a hriattir ; He thil hi ka hre ve lo - Home Minister

Home department chuan November 8, 2021 khan Mizoram leh Assam ramri depa awm district pahnih - Kolasib leh Mamit DC-te hnenah lehkha thawnin, ramri-ah hmalakna neih loh tur a nih thu an hriattir. Hemi chungchang hi Home minister Lalchamliana chuan a hriat loh thu a sawi.

Home department chuan Kolasib leh Mamit bawrhsapte hnenah hian Mizoram leh Assam ramri buai laiah chuan hmalakna neih loh tur (status quo) a nih thu a hriattir a; hei hi November 5, 2021-a Ministry of Home Affairs aṭanga thu an dawn anga tih a nih thu an tarlang.

Kolasib DC chuan, Home department aṭanga a thu hmuh bawhzuiin November 10, Nilaini khan Vairengte SDO (Civil) leh Bairabi SDC hnenah lehkha a thawn a; ramri buaiah hmalakna nei lo tur leh construction work-te titawp turin a hriattir a ni.

Vanglaini palai zawhna chhangin Home minister Lalchamliana chuan, ramria hmalakna tihtawp chungchang chu a la hriat ve loh thu a sawi a, "Order ka la hmu lo a, a ṭul angin hma kan la chhunzawm ang," a ti a, order chhuah chhan a la hriat loh thu a sawi.

Lalchamliana chuan, ramria Mizoram police-te chu lak chhuah an nih dawn loh thu sawiin, "Tuna kan dahna chinah hi chuan an awm reng ang, kan la chhuak dawn lo," a ti.

Assam media-te tarlan danin, tun hnai khan Assam sorkara Environment & Forest Secretary chuan Mizoram Chief Secretary hnenah lehkha thawnin, Mizoramin Assam chhung km. 4 thlengin hma a la niin a tarlang a, hmalaknate chu tihtawptir turin a hrilh a ni.

Hetih lai hian, November 8, 2021-a Vairengte-I VC-te'n Vairengte police checkgate bul aṭanga Vairengte chhuah lam Mautui zaua Mizoram police-te awmna thleng kawng laih an tum chu Assam police-te'n thing leh mau hmangtein an lo dang.

Vairengte VC-I hruaitute'n kawng chu Mizoram police-te awmna thleng bâk an laih dawn loh thu an sawi hnuah Assam police chuan an tibuai zui lo a, kawng laih tlang a ni.

Mizoram leh Assam-te'n ramria buaina a neih hnuhnun ber aṭangin state pahnihin ramri-ah kawng hrang hrangin hma an la ve ve a, hmun hrang hrangah kawng an lài ve ve a ni.