Aizawla traffic tihziaawmna turin Flyover leh terminus siam tum

Nimin khan chief minister Zoram­thanga hoin sorkar thuneitute CM Office conference hall-ah an ṭhukhawm a; Aizawl khawpuia kawng tâwt lutuk tihziaawmna tura flyover leh terminus siam tum an thlirho.

Sorkar thuchhuah tarlan danin, Mizoram sorkar chuan flyover leh termi­nus siam tum zir chiang turin Tele­communications Consultant India Ltd. (TCIL) a ruai a, TCIL chuan Aizawl khawpui an zir chian hnuah Bawngkawn leh Vaivakawnah flyover siam leh, public leh commercial vehicle chawlhna hmunpui terminus siam chungchangah feasibility report an siam a, chungte chu ṭhutkhawmah hian inhrilhfiaha sawiho a ni.

Meeting chuan TCIL report chu a thuphungin an pawm a, report zûlzuiin detailed project report siam thuai an rél a; hmalakna tur sum hmuh thuai a nih theih nan a rang thei ang bera sorkar laipuia bawhzui an rêl bawk.

Ṭhutkhawmah hian Planning Board vice chairman H Rammawi, adviser to CM (technical) K Lalsawmvela, additional chief secretary JC Ramthanga, PWD engineer-in-chief Lalmuankima Henry leh sorkar official dangte an tel a ni.