India rama Governor & Lt. Governor Conference-ah Mizoram Larsap a tel

Union Home minister Amit Shah hoa nimina New Delhi-a Governors & Lt Governors Conference-ah Mizoram Governor Hari Babu Kam­bham­pati a tel a, Mizoram sorkar hmalakna hrang hrang a tarlang.

Conference-ah hian governor leh lieutenant governor-te chuan an state/ union territory ṭheuh report an tarlang a, Best Practices at Raj Bhavan tih thupui an zirho nghal a ni.

Mizoram lársap Hari Babu Kambhampati chuan Mizorama hma­sawnna hrang hrang leh hna kal laite a tarlang a; Mizoramin Covid-19 donaa hma a laknaa local/village task force hmalak dan te, kohhran, tlawmngai pawl leh khawtlangin sorkar an thlâwp dante a sawi.

Mizorama mihring nuai 12 zingah Covid-19 vaccine lak hmabak tlemtê chauh an awm tawh thu te, Mizoram sorkar leh World Bank-in healthcare leh health infrastructure tihhmasawnna atan US dollar nuai 400 hû project-ah thawhhona thuthlung an ziah tawh thu te, Socio Economic Development Prog­ramme (SEDP), Swachh Bharat Mission, Kala­dan Multi-Modal Tran­sit Transport Project (KMMTTP) hnathawh mekte leh hmalakna lang­sar zualte a tarlang bawk.