KHAWTHLIR

Thisen pe
Nimin khan Mizo Chelsea Supporters chuan Aizawl Civil Hospital blood bank-ah thisen unit 46 an pe a, petute mipa 42 leh hmeichhia pali an ni. Kolasib-a St. John's Higher Secondary School NSS volunteer-te chuan nimin khan Kolasib District Hospital blood bank-ah thisen unit 16 pein, petute mipa 11 leh hmeichhia panga an ni a; Sihphir HSS NSS volunteer-te pawhin Synod Hospital blood bank-ah thisen unit 11 an pe a, petute mipa paruk leh hmeichhia panga an ni.

Inkhawm dan tur
Kolasib bawrhsap Dr H Lalthlangliana chuan, Kolasib district-a kohhran inkhawm theih hun, 'Chhunah leh Pathianni zanah' tih chu zan dang pawh huamin 'Chhun leh zanah' tiin a thlak. Inkhawm dan tur chu kohhran committee-in ṭul leh ṭha an tih angin an rél dawn a ni. Inkaihhruaina hi November 13, 2021-a hman ṭan tur a ni a, Kawnpui leh Lungdai khuate erawh a huam rih lo.

Go First thlâwk
Go First (GoAir tih ṭhin) chu nimin aṭang khan Mizoramah a thlawk chhunzawm leh a, Civil Aviation principal consultant Wg.Cdr. J Lalhmingliana'n Lengpui Airport aṭangin a vailiam. Sorkar thuchhuah tarlan danin, Go First thlawhtheihna chu tun kar chhung bikah Ningani, Zirtawpni leh Inrinniahte a thlâwk phawt a, kar leh aṭanga an thlawh dan tur chu vawiinah tihchhuah beisei a ni.

BSNL-in ngen
BSNL chuan thuchhuah siamin, Chaltlang to Ramhlun North via DIET kawng siamnaah November 10, Nilaini khan BSNL cable tihchhiah a nih avangin Chaltlang Lily Veng, Ruam Veng, Mualveng leh Salem Venga telephone leh internet service hun eng emaw ti chhung a hman theih dawn loh tih an tarlang a, mipui hriatthiamna an ngen.

Kawng khar dawn
Traffic SP chuan nimin khan thupek chhuahin ni 13.11.2021 zan dar 9 aṭanga a tuk ni 14.11.2021 chhun leh zan hian BOC junction, Chanmariah tui pipe lian phum hna an thawh dawn avangin hnathawh chhungin helai kawngpui hi khar a nih dawn thu a tarlang.