Dr Thangtea'n Health Minister meeting-ah Mizoram Covid vaccine dinhmun a sawi

Union Health & Family Welfare minister Dr Mansukh Mandaviya hoin nimin khan state leh union territory tina health minister-te'n online meeting an nei a, Mizoram aṭangin Health minister Dr R Lalthangliana telin, Covid-19 vaccine pek kawnga Mizoram hmalak dante a sawi.

Dr Mansukh Mandaviya chuan, India ramah vaccine la thei bituk kum 18 chung lam zinga 79%-in first dose an lak tawh thu leh chu'ng zinga 38% chuan second dose an lak tawh thu a sawi a, "Mi vaibelchhe 12 chuangin second dose lak an la hmabak," a ti a; Prime Minister-in ‘Har Ghar Dastak’ campaign a puan kal mekah kum tling chin zawng zawng vaccine pek kim an nih theih nan ṭan la thar turin health minister-te a chah.

Union HFW Minister chuan, Singapore, Britain, Russia leh China-ahte mipui 80% aia tamin vaccine an la tawh chungin hripui kai thar an pung nasa tih sawiin, "Vaccine pek leh Covid-19 laka invennate hi kal kawp tur a ni a, vaccine la tawhte pawh inthlahdah a thiang lo," a ti a, ṭan rual a ngaih thu a sawi.

Health minister Dr R Lalthangliana chuan, January 16, 2021-a vaccine pek ṭan aṭangin Mizoramah chhum lo chat loin ngawrh taka vaccine pek a nih thu sawiin, "November 10, 2021 thlenga Mizorama vaccine pek tawh zat chu dose 12,29,486 a ni. First dose pek tawh zat 7,00,373 hi Mizoram mipui aṭangin 90% a ni a, first dose pek tawh aṭangin second dose mi 5,29,113 (76%) pek tawh a ni," a ti.

Dr R Lalthangliana sawi danin, Mizoram sorkarin Electoral Roll 2020 behchhanin kum 18 chung lam mi 7,75,106 hnenah vaccine pek tur an awma chhût a ni a, sorkar laipuiin Septem­ber 15, 2021 khan Mizoramah kum 18 chung lam mi 8,67,000 awm angin a chhût thung. Mizoram sorkarin electo­ral roll thar ber anga a chhût zat aiin sorkar laipui chhût zat chu 91,894-in a tam zawk a ni.

Mizoram sorkar data leh HFW ministry data a inmil thei lo tih sawiin R Lalthangiana chuan, "Mizoram sorkarin 90% hnenah first dose pe tawh anga a chhût laiin, sorkar laipui chuan 81% angin a chhinchhiah thung," a ti.

Mizoram HFW Minister sawi danin, Mizoramin Covid-19 vaccine dose 15,82,680 a hmu tawh a; vaccine lak zawha harsatna tâwk adverse events following immunization (AEFI)-te zingah mi 1,558 chu minor case niin buaipui zui ngai an awm lo. Buaipui zui ngai (serious case) pathum a awm a, mithiamte'n an chhui zui mek.

Mizoramah damlo leh harsatna hrang hrang vanga vaccine lakna hmun pan thei lote zawn chhuah an ni a, an inah kalchilhin vaccine pek a ni ṭhin. Damlo khuma mu mi 912 hnenah first dose pek a ni tawh a, anmahni viltu/enkawltu mi 32 hnenah first dose pek a ni tawh bawk.

Fûrpui laiin Lawngtlai leh Mamit district-a khaw kilkhâwr zualte tlawhpawh theih loh a awm nual a, fûr a reh tawh avangin tunah hian beihpui thlak mek a ni.