Pawl hrang hrang telna JAC on Oil Palm-in Oil palm chungchangah sorkar ngen nawn

Joint Action Committee on Oil Palm (JAC) chuan nimin khan thuchhuah siamin, oil palm-in ram leilung a tihchhiat theih avang leh nghawng ṭha lo a neihte ngaihtuaha Mizoram leh hnam himna thlir chunga hma la turin Mizoram sorkar leh Agriculture department an ngen nawn.

ASEP, BIOCONE leh Conservation Mizoram-te telna JAC on Oil Palm chuan, National Mission on Edible Oil - Oil Palm Mission hnuaia Mizorama oil palm chìn tharthawh tum chungchanga Agriculture directorate-in November 5, 2021-a titihona hun an buatsaih chu lawmawm an tih thu an sawi rualin, "Rilru zau tak leh inhawng takin kan sawiho niin kan hria," an ti a; titihona chuan Mizoram leh a chhunga chengte himna turin rah ṭha zawk a chhuah an beisei thu an sawi.

Sum leh páia hlâwkna phêna oil palm chungchanga nghawng ṭha lo awm theite ngaihtuah chung leh ram leh hnam himna tur thlir chunga hmalak an duh thu sawiin JAC chuan, "Chîk zawk leh ril zawk, uluk leh fimkhur taka zir chiang a, thu dik leh belhchian dâwl chauh hmanga zirtirna pe ṭhin tawh turin Agriculture department thuneitute kan beisei a ni," an ti.

JAC on Oil Palm chuan, red oil palm chíng mek leh hlawhtlinpui mekte thinlung taka an lawmpui thu leh chíng mektute enkawl zui leh puihbawm chungchangah sorkarin theihtawp a chhuah zel an beisei thu an sawi a; chutih rualin, oil palm-a beidawnga suat leh tate leh suat mekte an tawrhpui a, chhawmdawlna awm thei ang ang sorkarin ngaihtuahsak se an duh thu an tarlang.

JAC chuan, "Oil palm tharthawha chìn thar leh hi kan ram leh a chhunga cheng nungcha chi hrang hrang, tualṭo thlai leh hnimhnah hrang hrang te, leilung, tuihna leh kan hnam ziaráng leh nunphung, kan sakhuana thlenga nghawng ṭha lo zawk nei thei a nih avang te, kut hnathawka eizawng tam zawk tan pawha hnemhnànpui awm chuang lo tur a nih avangin ṭha kan tih loh dan a la ngai reng a, kan dinna ngaiah kan la ding reng a ni," an ti.