Rubber chin hian Mizoram economy A siamṭha theiin ka ring - R Lalzirliana

Nimin khan Land Resources, Soil & Water Conservation (LRSWC) pisa chhakah Rubber Development Board pisa hawn thar a ni a, a hawngtu LRSWC minister R Lalzirliana chuan rubber chinin Mizoram economy a siamṭhat theih a rin thu a sawi.

R Lalzirliana chuan khawvel sik leh sa inthlakdanglam avangin tun hma-a thei leh thlai ṭhat theih lohna hmunahte a ṭhat theih tawh thu sawiin, "Rubber pawh tun hmain phai zawl khaw lumah a ṭha thin a, mahse tunah chuan tlang ramahte pawh a ṭha tawh. Rubber chin hian Mizoram economy a siamṭha thei niin ka hria. Department-in rubber chingtute puih nan theihtawp a chhuah mek," a ti.

LRSWC Minister chuan hun hmasa lamah an department chu zuihral mai tur anga sawi a ni fo ṭhin nia sawiin, "Mah se, tunah chuan hming thar nen department huang zauh thar zel a ni," a ti a, department-a thawktute chu ṭhahnemngai leh zuala thawk turin a beisei thu a sawi.

Mizoram ngeia Rubber Board pisa hawn a ni chu department tan mellung pawimawh tak a nih thu sawiin LRSWC Minister chuan, "Rubber chingtute tan hlawkpui zawka rubber chin leh an hralhchhuah naah bung thar kaina niah ka ngai," a ti.

Sorkar hnathawk reng rengin an thawhchhan ber chu an mahni tan ni lo, mipui tan ber a ni tih hi an hriat reng a ngaih thu sawiin R Lalzirliana chuan, "Chutiang rilru pua an thawh chuan ram hi a ṭhan ang turin a ṭhang thei anga, chu chuan ram hi a tichangkang thei dawn a ni," a ti.

R Lalzirliana chuan, "Sorkar a inthlakin, a hmasa-a sorkarin a lo kalpui tawh leh a tuipuite sorkar mekten an hluihlawn chuan kuthnathawktuten an tuar nasa ber ṭhin," a ti a, kuthnathawktute tana hmalakna ṭha leh an hlawkpui theih chi thilte chu kalpui zel ṭha a tih thu a sawi.

Pisa thar hawn inkhawm hi LRSWC director Hualthanga'n kaihruaiin, secretary K Lalrinzuali pawhin thu a sawi. Rubber Development Board pisa hi Rubber Board of India-a asst. development officer Chiranjib Banik-in a ṭhutchilh dawn.